Jańa ǵana Qyrǵyzstan Premer-mınıstri Sapar Isakov bastap kelgen quramynda 30-ǵa jýyq ókiletti múshesi bar resmı delegasıamen kelissózder aıaqtaldy.
Bul sapar qyrǵyz tarabynyń bastamasy boıynsha telefon arqyly bolǵan áńgimeniń qorytyndysy negizinde ótti. Kelissóz ekonomıkalyq máseleler boıynsha jan-jaqty talqylaýlarmen bastaldy.
Birinshiden, biz ekijaqty ekonomıkalyq baılanystardyń ózekti máselelerin talqyladyq. Olar eki el arasyndaǵy shekara jáne kólik tasymalyna, fıtosanıtarlyq, veterınarlyq baqylaýǵa qatysty boldy.
Sondaı-aq, EAEO normalaryna sáıkes keden jáne salyqtyq retteý máselesi boıynsha problemalyq máseleler qaraldy. Mysaly, bizdiń keden organdary Qytaıdan Qazaqstan aýmaǵy arqyly taýar alyp ótý barysynda qyrǵyz kásipkerleriniń jalǵan deklarasıa berý faktilerin anyqtap otyr. Budan biz kóptegen shyǵyn shegýdemiz.
Qyrǵyz taraby qoıylyp otyrǵan máselelermen kelisti. Qyrǵyz Premer-Mınıstri Qyrǵyzstan tarapynan mindettemelerdiń barlyǵyn buljytpaı oryndaýǵa, sondaı-aq Eýrazıalyq Ekonomıkalyq Odaqtyń ekonomıkalyq múddelerin qorǵaýǵa baılanysty máselelerdiń úılesimdi sheshimderin tabýǵa kepildik berdi.
Ekinshiden, kelissózderdiń qorytyndysy boıynsha eki el Premer-mınıstrleriniń birinshi orynbasarlarynyń tóraǵalyǵymen jumys tobyn qurý týraly sheshim qabyldandy. Jumys toby aldaǵy 5 jumys kúni ishinde birlesken Jol kartasyn daıyndaýy tıis.
Jol kartasy qabyldanǵan soń taraptar kelisimderdiń tolyq oryndalýyn qamtamasyz etýge mindetteme alady.
Sondaı-aq, biz osy jylǵy 19-shy qazanda saǵat 00:00-den bastap eki eldiń memlekettik shekarasyn, ásirese, Qordaı beketinde, kesip ótýdiń basym tártibin qamtamasyz etetin bolyp kelistik.
Kelisim boıynsha qol júkterimen ótetin jeke tulǵalar, jolaýshylar tasymaldaıtyn avtokólikter, jeńil avtokólikter jáne bos júk kólikteri úshin memlekettik shekarany kesip ótýdiń basym tártibi qabyldanady.
