Interpol jelisi boıynsha qazaqstandyq jýrnalıs Janar Ahmet halyqaralyq izdeýde júr, dep Qamshy.kz aqparat agenttigi korrespondent.net saıtyna silteme jasap habarlaıdy. 

Janar Ahmettiń qorǵaýshysy onyń  Vyshgorod qalasynyń ýaqytsha ustaý abaqtysynda otyrǵanyn málimdegen bolatyn. Jýrnalıstiń qorǵaýshylarynyń biri Vladıslav Grıshenkonyń habarlaýynsha, ol Kıev-Svátoshınsk aýdanynda ustalyp, sol ýaqytta quzyrly organdar hattama jasaǵan. Janar Ahmettiń ustalýynyń sebebi: Interpoldyń jelisi boıynsha halyqaralyq izdestirý tiziminde bolǵandyǵy jáne Qazaqstanda alaıaqtyǵy úshin izdeý jarıalanǵany eken. Qazir jýrnalıs Vyshgorod qalasyndaǵy ýaqytsha ustaý abaqtysynda.

23 qazanda, ıaǵnı búgin  Kıev aýdanynyń Kıev-Svátoshınsk soty Janar Ahmetti «ekstradısıalaý rásimi sheńberinde ýaqytsha qamaýǵa alý týraly» máseleni qaraıtyn bolady. Aıta ketý kerek, ustalǵan jýrnalıstiń kámelettik jasqa tolmaǵan balasy bar. Ol tanystarynyń qamqorlyǵynda. Óıtkeni, olardyń Ýkraınada eshqandaı týystary joq.

Kıev oblysyndaǵy Ulttyq polısıanyń ókili Nıkolaı Jýkovıch Janar Ahmettiń qalaı ustalǵanyn jáne onyń turǵylyqty jerin rastady. «Qylmystyq is júrgizý kodeksiniń 208-baby («Ýákiletti laýazymdy tulǵanyń ustalýy») boıynsha ustalǵan qazaqstandyq jýrnalıs Vyshgorod qalasyndaǵy  ýaqytsha ustaý abaqtysynda. Erteń nemese arǵy kúni sotqa shaqyrylady. Ol Interpol jelisi boıynsha izdeýde bolǵandyǵy úshin qamaldy», - dedi Jýkovıch.

Esterińizde bolsa, Janar Ahmet 2017 jyldyń naýryz aıynda Qazaqstannan Ýkraınaǵa qashyp ketken bolatyn.