Qazaqstanda «Rýhanı jańǵyrý» baǵdarlamasy aıasynda joǵary oqý oryndarynda «Uly dala jastary» jobasy iske qosyldy, dep habarlaıdy Qamshy.kz aqparat agenttigi.
Ony «Rýhanı jańǵyrý» baǵdarlamasy basqarý ofısiniń menedjeri Bolat Atybaı dóńgelek ústel májilisinde tanystyrdy.
«Tárbıe jáne bilim baǵdarlamasy» úsh baǵyttan turady. Sol úsh baǵyttyń bireýi - sanaly azamat. «Sanaly azamat» baǵytynyń sheńberinde «Uly dala jastary» jobasy ázirlendi. Rýhanı jańǵyrý baǵdarlamasy aıasynda jasalyp jatqan jumystardan joǵary oqý oryndary shet qalǵan bolatyn. Sol JOO-lardy Rýhanı jańǵyrý baǵdarlamasyna qosý úshin osy joba jasaldy. Osy jobadan basqa 21 joba bekitilip barlyq óńirlerge joldandy. Jobanyń maqsaty - elimiz alǵa qoıǵan mindetterdi jastardyń boıyna sińirý», - dedi Bolat Atybaı.
Almaty qalasy boıynsha «Rýhanı jańǵyrý» ofısiniń bas mendjeri Laýra İrgebaeva «Uly dala jastary» jobasynyń ıdeıasyn Bilim jáne ǵylym mınıstrligi usynyp otyrǵanyn aıtty.
«Negizi bastamashy - QR Bilim jáne ǵylym mınıstrligi. «Uly dala jastary» jobasy qazan aıynan bastaldy. Joba jastardyń belsendiligin arttyrýǵa, ıaǵnı, ǵylym, bıznespen aınalysýyna jaǵdaı jasaý. Oqý ornyn bitirgen jastardyń jumyspen qamtylý deńgeıi tómen. Ne úshin tómen? Osy máseleniń barlyǵy qamtylatyn bolady», - dedi Laýra İrgebaeva.
Jıynda JOO ustazdaryna joba boıynsha óz oqý oryndaryna yńǵaıly bolatyn usynys jasap, jumys baǵdarlamasyn ázirleý tapsyryldy.
Elbasynyń «Rýhanı jańǵyrý» baǵdarlamalyq maqalasyna qatysty Abaı atyndaǵy QazUPÝ oqytýshysy Jomart Sımtıkov bylaı dep pikir bildirgen bolatyn: «Bizdiń elde bilim – jalpyǵa ortaq. Sońǵy jyldary ekonomıkalyq damýdyń kásiptik sıpaty buryn-sońdy eshbir ýaqytta osylaısha jedel ózgermegen bolatyn. Tehnologıanyń qarqyndy revolúsıasy bizge taıaý onjyldyqta qazirgi kásipterdiń birazy joıylyp ketetinin kórsetedi. Elbasynyń sózimen aıtqanda: «Jastarymyz basymdyq beretin mejelerdiń qatarynda bilim árdaıym birinshi orynda turýy shart. Sebebi, qundylyqtar júıesinde bilimdi bárinen bıik qoıatyn ult qana tabysqa jetedi».
Ǵalamdaný jaǵdaıynyń zańdylyǵyna súıensek, sananyń ashyqtyǵy adamzat balasyn úlken jetistikterge jetkizedi. Uly daladaǵy qalyptasqan sananyń ashyqtyǵy men oı erkindigi nátıjeli túrde dala demokratıasyna ákeledi. HH ǵasyrda egemendikke qol jetkizsek, rýhanı jańǵyrý arqyly HHI ǵasyrda «Máńgilik el» baǵytyda kóshimizdi túzedik. Endeshe, ǵalamdanýdaǵy básekelestikte ulttyq kodymyzdy saqtaı otyryp jańǵyrý bizdiń eń basty qundylyǵymyz ekenin esten shyǵarmaıyq».
Aıta keter bolsaq, aǵymdaǵy jyldyń 9-qazanynda Memleket basshysynyń «Bolashaqqa baǵdar: rýhanı jańǵyrý» baǵdarlamalyq maqalasyn iske asyrý maqsatynda «Uly dala jastary» jobasyn daıyndaý, sondaı-aq jobany júzege asyrýǵa arnalǵan jıyn Respýblıkalyq jobalyq keńse múshesi Bolat Atybaıdyń basshylyǵymen M.Áýezov atyndaǵy OQMÝ-da jıyn ótken bolatyn. Atalmysh jıynda «Tárbıe jáne bilim» kishi baǵdarlamasy talqylanyp, ýnıversıtetter jaýapty bolatyn baǵdarlama Pasporttary jaıynda sóz qozǵalǵan.
