Polısıanyń 23 qazan kúni taratqan málimetinshe,olar reıd kezinde júzdegen qalta telefonyn tekserip, olardyń arasynan urlanǵan telefondardy tappaǵan. Biraq «ruqsat etilmegen jerde saýda jasaǵan» 12 adamnyń, «tirkeýsiz turyp jatqan» 30 adamnyń ústinen ákimshilik is qozǵalǵan. Bul azamattardyń barlyǵy keshe «Astana» saýda úıindegi jumystaryna qaıta kirisken.

«Astana» - Aqtóbeniń Ýálıhanov kóshesi boıyndaǵy kıim-keshek satatyn ortalyq. Senbi kúngi oqıǵa kýágerleriniń aıtýynsha, ustalǵan azamattardyń barlyǵy osy ortalyqta qalta telefony men oǵan qajetti aksesýarlardy satady. Birqatarynyń «Astana» saýda úıinde telefon jóndeıtin oryndary bar.

Solardyń biri-qalta telefonyn satýshy Aıbatty ótken senbi kúni arnaıy jasaq anasynyń kózinshe avtobýsqa salyp áketken.

- Besin namazy shyqpaǵan kez edi. Saǵat túski birlerdiń shamasy. «Astanadaǵy» musylman baldardyń bárin eki avtobýsqa tıep áketti. Qalaı áketip bara jatqandaryn kózimmen kórdim. Tipti balalardy uryp jatqanyn da kórip, «urmańdar» dep aıǵaıladym, -deıdi Nursulý Gafarova.

Anasynyń sózine qaraǵanda, otbasyndaǵy bes balanyń biri birazdan beri Aıbat din jolyn ustanady. «Óz kúnin ózi kórip» , «bes teńgeni on teńge qylamyn» dep júrgen ulyn Nursulý Gafarova saqalyna bola eshbir mekeme jumysqa almaıtynyn aıtady. Sondyqtan Aıbat satýshylyqqa jaldanyp, júkti kelinshegi men baýyrlaryn asyrap júrgen kórinedi.

Ótken senbi kúni jumys ornynan polısıa alyp ketken Eset «Astana» saýda úıinde qalta telefonyn jóndeıdi. Esettiń anasy Jańagúl Ábdiǵalıevanyń sózine qaraǵanda, polısıa ulyn osyǵan deıin de bir ret jumys ornynan aldy-artyna qaratpaı alyp ketken.

Qalta telefonyn satýshylardyń analaryn Azattyq tilshisi 21 qazan kúni tús álpetinde Aqtóbeniń eski bóligindegi Elek polısıa bóliminiń janynan kezdestirgen bolatyn. Basym kópshiliginiń syrt keıpi din ustanatyndyǵyn ańǵartatyn on shaqty áıel Elek polısıa bóliminiń qara qulyp salynǵan qaqpasynan ishke qaraı óte almaı turdy.

Azattyq tilshisine sol kúni keshkilik habarlasqan Alfıa esimdi áıel ábden jaýraǵandaryna qaramastan polısıa bóliminiń qasynda alty saǵat boıy turǵandaryn aıtty. «İnim keshki alty jarymdar shamasynda ǵana shyqty» deıdi Alfıa.

Polısıanyń bul áreketin Aqtóbe oblystyq prokýratýrasynyń apparat jetekshisi Jasulan Dáýlembaev «telefon urlyǵyn ashýǵa baǵyttalǵan is-shara» dep túsindirdi. Dáýlembaevtyń aıtýynsha, kúshtik qurylymdardyń qolynda urlanǵan telefondardyń barlyǵy «Astana» saýda úıine ótkiziletindigi týraly málimet bolǵan.

Aqtóbe qalalyq ákimdigi áleýmettik jeliler arqyly taratqan aqparatta sońǵy kezderdi Aqtóbede qalta telefondary men planshetterdiń qoldy bolýy jıilep ketkendigi týraly aıtylady. Sondyqtan kúshtik qurylymdar urlanǵan elektrondy tehnıkany satyp alyp, saýdalaıtyn jerlerdi jappaı teksere bastapty.

Al Aqtóbe oblystyq İİD baspasóz qyzmeti telefon urlyǵyna qatysty statısıka men «Astana» saýda úıinen senbi kúni qansha adamnyń áketilgeni týraly málimet berýden bas tartty. Telefon satýshylardyń týystary qyryqtan astam azamattyń alty saǵat boıy Elek polısıa bóliminde bolǵanyn aıtady. Polısıa bul aralyqta "olarmen profılaktıkalyq áńgime júrgizilip, kásipker-salyq tóleýshi retinde tirkelýdiń qajettigi týraly aıtyldy" dep habarlaıdy.