Ózbekstan prezıdenti Shavkat Mırzıaev qazannyń aıaǵynda resmı saparmen Túrkıaǵa barady. Bul týraly Qamshy.kz aqparat agenttigi Azattyq saıtyna súıene otyryp habarlady. Ózbekstan basshysynyń sapary 25-27 qazanda Túrkıa prezıdenti Redjep Taıyp Erdoǵannyń shaqyrtýymen ótedi.
Eki eldiń basshylary sońǵy márte 10 qyrkúıekte Astanada Islam áriptestigi uıymynyń samıtinde kezdesti. Sol kezdegi kelissózder barysynda saýda-ekonomıkalyq, ınvestısıalyq, týrızm jáne basqa da salalardaǵy áriptestikti arttyrý máseleleri talqylanǵan.
Bunyń aldynda Shavkat Mırzıaev Túrkıa azamattary úshin vızalyq júıeni jumsartý týraly qaýlyǵa qol qoıdy. Endi olar Ózbekstan vızasyn shaqyrtýsyz ala alady, ony úsh kúnde jasap beredi.
Túrkıa men Ózbekstan arasyndaǵy taýar aınalymy - $1,2 mlrd. Osy ýaqytqa deıin túriktiń qurylys kompanıalary Ózbekstanda 110 jobany júzege asyryp, $2 mlrd ıgergen. Buǵan qosa, Ózbekstandaǵy túrik ınvestısıasy - $1,2 mlrd.
