Nursultan Nazarbaev Abý-Dabıdiń taq murageri, Birikken Arab Ámirlikteriniń Qarýly kúshteri Joǵarǵy Bas qolbasshysynyń orynbasary, sheıh Muhammed ben Zaıd Ál Nahaıanmen kezdesti dep habarlaıdy Qamshy.kz aqparat agenttigi Aqordanyń baspasóz qyzmetine silteme jasaı otyryp.

Kezdesýde Memleket basshysy Qazaqstan men Birikken Arab Ámirlikteri arasyndaǵy qarym-qatynas ózara senimge negizdelgenin atap ótip, ony ári qaraı tabysty damytýdyń mańyzdylyǵyna nazar aýdardy.

– Sizder bizdi halyqaralyq arenada da, ekonomıkada da árdaıym qoldap kelesizder. Osy jyldar ishinde sizdermen dostyq qarym-qatynas ornattyq. Qazaqstanǵa erekshe kóńil bólip otyrǵandaryńyz úshin rızashylyǵymdy bildiremin, – dedi Memleket basshysy.

Qazaqstan Prezıdenti qazirgi ýaqytta ekonomıkanyń túrli sektorlarynda, sonyń ishinde munaı hımıasy, aýyl sharýashylyǵy jáne atom ónerkásibi salalarynda birqatar birlesken jobalardy iske asyrý josparlanyp otyrǵanyn aıtty.

Nursultan Nazarbaev musylman elderi arasynda zamanaýı tehnologıalardy damytý jaǵynan Birikken Arab Ámirlikteri kósh bastaýshylardyń biri bolyp otyrǵanyn atap ótti.

– «Bolashaqtaǵy ózgeriske saı bolamyn deseń, búgin óziń ózger» degen dana sóz bar. Sizder sol joldan taımaı kelesizder, – dedi Memleket basshysy.

Abý-Dabıdiń taq murageri eki jaqty baılanystar serpindi damyp kele jatqanyn aıtyp, Nursultan Nazarbaevtyń eki el arasyndaǵy qarym-qatynasty nyǵaıtý isindegi belsendi róline toqtaldy.   

– Biz kóp nárseni sizderden úırenip kelemiz. Sizdiń reformalaryńyz ýaqyt talabyna saı júrgizilýde. Qazaqstan Sizdiń kóregen saıasatyńyzdyń arqasynda turaqty damyp keledi, – dedi sheıh Muhammed ben Zaıd Ál  Nahaıan.   

Kelissózder barysynda taraptar halyqaralyq jáne óńirlik kún tártibindegi ózekti máselelerdi de talqylady.