Hıtke aınalǵan «Zyń-zyń» ániniń avtory qaıtys boldy. Mundaı habardy ánshi Serik Ibragımov óziniń ınstagram paraqshasynda jetkizdi, dep jazady Qamshy.kz aqparat agenttigi.

“Assalaýmaǵaleıkým, jaqyndar! Aıtaıyn degenim, qamshynyń sabyndaı ómirde syılasyp óteıikshi! Qolymyzdan kelgenshe jaqsylyq jasaıyq, kelmese úndemeıik! Keshirim suraıyq, keshireıik! Búgin barmyz, erteń joqpyz! Shynynda da jalǵan dúnıe! Bizdiń sózimizdiń, istegen isimizdiń, jazǵan jazýmyzdyń qaısysy sońǵy ekenin Alla ǵana biledi! Sondyqtan jaqsy amal jasap júreıikshi! Jamandyq jasaımyz dep, kelmeıtin saparǵa attanyp ketip, ókinip qalmaıyqshy!

Sýrette turǵan baýyrymnyń, dosymyzdyń esimi Bolat! Ol baýyrymyz endi aramyzda joq! Óte jaqsy adam edi! Kishipeıil, aq kóńil jigit bolatyn! Baqılyq boldy! Alla meıirimine alsyn! Meıirimi sheksiz Allaxym jánnáttan oryn ber! Keshirimdi Alla barshamyzdy keshir! Ia Allam raqymyńa alǵaısyń! Aýmın! Duǵa jasap qoıyńyzdar, aǵaıyn! Alla jar bolsyn, barshamyzǵa!” – dep jazdy Ibragımov.

Aıta keteıik, birneshe kún buryn Tengrinews.kz portaly jastar arasynda keńinen taralǵan «Zyń-zyń» ániniń avtorynyń belgili bolǵanyn habarlaǵan. Ol kompozıtor Bolat Nurymov edi. Shymkentte týǵanymen Almatyda ósken jas jigit kóptegen tanymal ánshilerge án jazǵanyn aıtqan.