Japondyq «NHK» teleradıokompanıasy óz kórermenderine Qazaqstan jáne «Astana Ekspo-2017» halyqaralyq kórmesi jaıynda 110 mınýttyq baǵdarlama taratty dep habarlaıdy Qamshy.kz aqparat agenttigi.
Arnaıy jobanyń avtory, tanymal japondyq jýrnalıs – Okoshı Kensýke. Osy jyldyń shilde aıynda Qazaqstanǵa japon telearnasynyń túsirilim toby kelip, elimizdiń – Atyraý, Qaraǵandy, Semeı, Aqtaý, Almaty jáne t.b oblystaryna issaparmen baryp qaıtqan bolatyn.
Atalmysh jobada japondyq áriptester memleketimizdiń damýy jaıynda, qazaqstandyqtardyń turmys-tirshiligin, mádenıeti men salt-dástúrin keńinen kórsetti. Japon jýrnalıseriniń aıtýynsha, bul Qazaqstan jaıly Japon televızıasy tarıhyndaǵy kórsetilgen eń alǵashqy da aýqymdy baǵdarlama.
Sondaı-aq joba aıasynda, baǵdarlamanyń tutastaı bir bóligi «QAZAQSTAN» Respýblıkalyq teleradıokorporasıasynyń qyzmetine arnalǵan, ásirese Ulttyq arnadaǵy ózgeristerdi erekshe atap ótken. Joba jetekshisi Okoshı Kensýke Astanaǵa ózi arnaıy kelip, shyǵarmashylyq toppen birqatar baǵdarlamalardyń túsirilimine qatysyp, Basqarma tóraǵasy Erlan Qarınnen suhbat aldy. Japondyq áriptesterdi teleradıokorporasıanyń jumys barysy, telearnadaǵy ózgerister, biregeı formatta shyqqan jańa da, tyń jobalar tánti etti.
Aıta keteıik, bul bastama «NHK» jáne «QAZAQSTAN» teleradıokorporasıalary arasyndaǵy yntymaqtastyq ornatýdaǵy eń alǵashqy qadam bolmaq.
Sonymen qatar, osy jyldyń qazan aıynda teleradıokorporasıanyń delegasıasy Japonıaǵa issaparǵa barýdy josparlap otyr. Onda, Basqarma tóraǵasy Erlan Qarın «NHK» teleradıokompanıasynyń prezıdenti Rıochı Ýedamen kezdesedi.
İssapar barysynda japondyq áriptestermen qarym-qatynas ornatyp, túsirilim alańdaryna baryp, kontent pen tájirıbe almasý múmkindigin qarastyrady.
