Búgin Almaty qalasynda «Úkimettik emes uıymdar mektebi» jobasy aıasynda «Rýhanı jańǵyrý: azamattyq sektordyń áleýmettik bastamalary men jobalary» atty jármeńke bolyp ótti, dep habarlaıdy Qamshy.kz aqparat agenttigi.

Atalmysh sharany Almaty qalasy İshki saıasat basqarmasynyń qoldaýymen QR Prezıdenti janyndaǵy «Qoǵamdyq kelisim» RMM jáne Respýblıkalyq Dostyq Úıiniń jumysyn qamtamasyz etý Qyzmetimen birlese otyryp «Qazaqstannyń ÚEU ARO ulttyq júıesi» Asosıasıa nysanyndaǵy ZTB uıymdastyrdy.

Atalmysh jobanyń negizgi mindeti maqsattary – Almaty qalasynyń maqsatty toptary úshin áleýmettik qyzmetter kórsetý salasynda jumys isteıtin komersıalyq emes uıymdardyń áleýmettik jobalarynyń ashyq baıqaýynyń nátıjelerin qorytyndylaý bolyp tabylady. Sonymen qatar, bul joba áleýmettik máselelerdi sheshýge baǵyttalǵan qoǵam talpynysyn biriktirý, sektorlyq ózara iskerliktiń áleýetin paıdalana otyryp úzdik ázirlemelerdi is júzinde júzege asyrý, birtutas tujyrymdamalyq baǵyttardy, qaǵıdalardy jáne strategıalardy jasaqtaýdy da maqsat tutqan.

Atalmysh jármeńkede óz jobalaryn usynýshylardyń biri Arman Áýbákir búgingi shara jóninde aıta otyryp, onyń qoǵamǵa tıgizer kómegi óte kóp ekendigin aıtty.

«Búgingi tańda Úkimettik emes uıymdardyń jumysyn óte jaqsy jolǵa qoıyp jatyr. Olardyń júıesin jeńildetip jatyr. Mysaly, buǵan deıingi Úkimettik emes uıymdar óz-ózimen jeke-jeke júretin bolsa, qazir osy uıym úkimettik emes uıymdar úshin demeýshilerdi ózi izdeıtin boldy. Úkimetten túrli-túrli qujattardyń jeńildetýin talap etedi. Eki ortada dánekerlik jasap, ár túrli jobalar usynǵan Úkimettik emes uıymdardyń jobalaryn damytatyndaı ár túrli ıdeıalyq konkýrstar uıymdastyryp otyrady. Ol konkýrstar óte jeńil, artyq qujattarsyz bolady. Ondaǵy eń mańyzdy nazar aýdararlyq másele – ıdeıanyń mańyzdylyǵy, onyń qundylyǵy bolyp tabylady», - deıdi Arman Áýbákir.

Onyń aıtýynsha, buǵan deıingi Úkimettik emes uıymdar óte kóp qujat jınaıtyn, konkýrsqa qatysý úshin eń mańyzdy qujat bolyp, ıdeıa óz jaıynda qalatyn edi.

«Osy ýaqytqa deıin kóptegen konkýrstarda qujattyń tolyq bolýy men jobany tanystyrý barysynda onyń qalaı bezendirilgenine basa nazar aýdaratyn. Sonyń saldarynan ıdeıanyń ózektiligi, onyń mańyzdylyǵy elenbeı qalatyn. Al, bul jobanyń bastamasy kóptegen úkimettik emes uıymdardyń jobasyn jaryqqa shyǵarýǵa, isterin júrgizýge kóp kómegi tıedi jáne qoǵamǵa da tıgizer paıdasy óte mol», - deıdi ol.

Aıta keter bolsaq, «Úkimettik emes uıymdar mektebi» jobasy aıasynda «Almaty qalasy ÚEU-larynyń úzdik áleýmettik jobasy» atty baıqaý jarıalandy. Bul – áleýmettik sala uıymdarynyń áleýmettik mańyzdy problemalardy sheshýdegi múmkindikterin, áleýmettik jobalardyń tusaý keserleri, memlekettik emes uıymdardyń memlekettik bılik organdarymen jáne bıznes qurylymdarmen yntymaqtastyǵyn arttyrýǵa qoldaý kórsetý, «Almaty 2020» qalanyń damý Baǵdarlamasy aıasynda Almaty qalasynyń áleýmettik jaǵynan az qorǵalǵan turǵyndarynyń sanatyna qoldaý kórsetý jáne problemalaryn sheshý arnasynda ujymdyq talpynysty biriktirý úshin áleýmettik seriktestik qatynastaryn damytý jáne iskerlik baılanystardy ornatýdy kórsetedi.

Atalmysh baıqaýdyń erejesi retinde «Rýhanı jańǵyrý» Ulttyq baǵdarlamasynyń jáne «Almaty 2020» qalany damytý Baǵdarlamasynyń basym baǵyttary usynylǵan. Bul baıqaýǵa – 31 Úkimettik emes uıym qatysyp, 36 joba usynylǵan.