Qyrǵyzstan premer-mınıstri Sapar Isakov 25 qazanda Erevandaǵy Eýrazıa úkimetaralyq keńesiniń otyrysynda qazaq-qyrǵyz shekarasyndaǵy jaǵdaıǵa qatysty pikirin aıtty,-dep Qamshy.kz aqparat agenttigi Azattyq saıtyna súıene otyryp jazady.
- Biz premer-mınıstrler deńgeıinde bul máseleni sheshý úshin kelissóz júrgizip jatyrmyz. Eki el shekarasyndaǵy keıbir kedergiler joıyldy. Ol úshin Qazaqstanǵa alǵys aıtamyz. Biraq bul másele týyndamaýy kerek edi. Sebebi eki el arasyndaǵy kelisimge saı júk tıegen qyrǵyz kólikteri shekarada turyp qalmaı kedergisiz ótýi tıis. Eýrazıa ekonomıka odaǵynyń prınsıpteri boıynsha taýar, kapıtal, qyzmet pen jumys kúshiniń qozǵalysyna kedergi bolmaýy kerek. Qazaqstan tarapy shekaradaǵy máseleni tolyq sheshedi dep úmittenemiz,- dedi Isakov.
Erevandaǵy otyrysta Qazaqstan premer-mınıstri Baqytjan Saǵyntaevtyń Sapar Isakovpen kezdeskeni habarlandy.
10 qazannan bastap eki el shekarasynda tekserý kúsheıtilip, Qazaqstanǵa ótetin adamdar men kólikter kezegi paıda bolǵan.
18 qazanda Astanada eki el premer-mınıstrleri kelissózder ótkizip, jolaýshy kólikteri men júgi bar adamdardy shekaradan ótkizýdi ońaılatý týraly ýaǵdalasqan. Bul kelissózden keıin tekserý beketinde kezek kútken adamdar sany azaıǵan edi. Al 25 qazanda Qyrǵyzstan shekara qyzmeti "Aq-tilek" shekara beketinde bes júzge jýyq júk kóligi turǵanyn habarlady.
