Almaty qalasyndaǵy Ulttyq kitaphananyń akt zalynda «Halyq murasy» atty án, kúı, jyr keshi ótti. Oǵan Ramazan Stamǵazıev, Rymkesh Jumadilova, Erkin Shúkimanov, Uljan Baıbosynova, Ardaq Isataeva, Murat Abýǵazy, Amankeldi Kúzeýbaı, Órken Dúısen, Sholpan Darjanova, Aıgerim Qaramenova jáne taǵy basqa óner qaıratkerleri, Qurmanǵazy atyndaǵy Qazaq ulttyq konservatorıasy Halyq mýzykasy fakúltetiniń stýdentteri qatysyp, qazaqtyń dástúrli ánderin ulttyq mýzykalyq aspaptarmen – dombyramen, qobyzben, sybyzǵymen, shertermen oryndady.

İs-sharanyń maqsaty – qaladaǵy ártúrli jamaǵat ókilderine, ıslam dinine bet buryp jatqan jastarǵa, shahar turǵyndaryna ata-babalarymyzdan qalǵan rýhanı murany dástúrli ánder arqyly nasıhattaý bolatyn.

Konsertti «Ál-Mádına» meshitiniń bas ımamy Baqytjan qajy Jańbyrbaıuly ashty. «Bizdiń ata-babalarymyz dindi ǵasyrlar boıy jyrǵa qosyp nasıhattady. Aqyndarymyz, jyraýlarymyz ózderiniń ósıet sózderin búgingi kúnge ulttyq aspaptarmen jetkizdi. Bul degenimiz qazaqtyń dástúriniń ishinde din jatqanyn kórsetedi. Búgingi ótkeli jatqan «Halyq murasy» atty án, kúı, jyr keshi – sol babalarymyzdan qalǵan rýhanı dástúrdiń jalǵasy» dedi ol.

Sahnada óner kórsetken árbir ánshi kórermenderdiń zor yqylasyna bólenip otyrdy. Kópshiliktiń kóńilinen shyqqan keshti Qurmanǵazy atyndaǵy Qazaq ulttyq konservatorıasy «Halyq áni» kafedrasynyń meńgerýshisi, Ónertaný doktory Amankeldi Kúzeýbaı júrgizdi.

Konsert aıasynda Ulttyq kitaphana qyzmetkerleri arnaıy kitap kórmesin uıymdastyrdy. Onda qazaqtyń dini men dástúrine qatysty kitaptar qoıyldy.

İs-sharaǵa Almaty qalasynyń zıaly qaýymy, ártúrli dinı jamaǵat músheleri, qoǵam qaıratkerleri, jastar uıymdary, stýdentter ÚEU jáne BAQ ókilderi qatysady.

Aıta keteıik, konsertti Almaty qalasy Din isteri jónindegi basqarmasynyń tapsyrysy boıynsha «El-shejire» qoǵamdyq qory uıymdastyrdy.

Jasulan Naýryzálıev