Búgin Facebook áleýmettik jelisinde Qaraǵandy oblysy Jezqazǵan qalasy Sarysý ózeninde balyqtardyń qyrylyp qalǵandyǵy týraly aqparat tarady. Buǵan sebep Jezqazǵan qalasyndaǵy «Jaltyrbulaq» ken oryny altyn shyǵaryp, qalǵan qaldyqtaryn Jezqazǵan qalasynyń boıyndaǵy Sarysý ózenine aǵyzyp jiberedi eken. Osy jaıly naqty aqparat alý úshin Qamshy.kz aqparat agenttiginiń tilshisi Qaraǵandy oblysy ákimdigine habarlasyp bilgen edi.
Qaraǵandy oblysy boıynsha Ekologıa departamentiniń basshysynyń mindetin atqarýshy Bekmuhanbetov Álibek Muratuly osy suraqqa jaýap berdi.
«Búgin osy aqparat bizge kelgen bolatyn. Buǵan naqty Jaltyrbulaq ken orynyn kinálaýǵa negiz joq. Qaraǵandy oblysy ákimdiginiń ınspektory men Orman jáne janýarlar ınspektory osy máseleni sheship jatyr. Qyrylyp qalǵan balyqtar men Sarysý ózeniniń sýynan taldama alynyp, zertteý jasalynady. Bul aqparat ras bolsa biz Buqaralyq aqparat quraldaryna habarlaımyz»,-dedi Álibek Muratuly.
Eske sala keteıik, 2016 jyly Sarykeńgir aýyldyq okrýginde altyn óndiretin kásiporyn ashylǵan bolatyn. 2010 jyly júrgizilgen geologıalyq barlaý jumystary nátıjeli bolyp, quramynda altyn bar ken tabylǵan. Kásiporyn sol baǵaly metaldy ashyq ádispen óndirýdi qolǵa aldy. Qaraǵandy oblysynyń kásipkerlikti qoldaý kartasyna engizilgen jobanyń jalpy quny – 3,4 mlrd teńgeni quraǵan.
