Ekranǵa jol tartqanyna kóp ýaqyt bolmasa da «Habar» telearnasynan kórermen júregine jol tapqan otbasylyq-tanymdyq «Ana men bala» baǵdarlamasy otbasy, oshaq qasyndaǵy tirlikten órkenıettiń ózine deıingi túıindi máselerdi qaýzaıdy. Qazirgi almaǵaıyp qoǵamda otbasylyq tanym, balaǵa degen súıispenshilik pen túsinik jalpy alǵanda otbasy máselesi qaı turǵydan qarasaq ta kún tártibinen túspek emes. Sebebi, ár adamdy tulǵa retinde qalyptastyryp, ómir jolynyń soqpaǵyna salyp ta beretin, onyń tańdaýyna, armanyna tikeleı yqpal etetin ol – otbasy, otbasynda alǵan tárbıe. Halyq danalyǵy «Otan otbasynan bastalady» dep tegin aıtpasa kerek-ti. Osynyń bárin bir úddege syıdyratyn «Ana men bala» baǵdarlamasy otandyq telearnadaǵy qazirgi tańda kóshbasshy dep aıtsaq ta qate aıtqandyq emes. Sebebi, ol qoǵamǵa qajet, onyń suranysyn týdyryp otyr.
Ásirese qazirgideı balaǵa áke men ananyń meıiriminen góri kompúter men smartfonnyń yqpaly kúsheıip turǵan ýaqytta BAQ tarapynan jón silter kómekshi dúnıeler kerek-aq. Óıtkeni tehnologıa qaryshtaǵan osynaý jantalas zamanda balaǵa kóńil bólý, onyń jan dúnıesine úńilý, balanyń tilin tabý ár adamnyń ońaı atqaryp tastaıtyn sharýasy bolmaı tur. Ýaqyt jetpeýshilik, jumysbastylyq, stress osynyń bári úlkenderge balanyń qabyletin baǵamdap, oǵan jol kórsetýge kedergiler keltirip otyrǵan faktorlar. Osy turǵyda erekshe daryny bar balalardy taýyp, olardy kópke tanytyp, balanyń qabyletin erte qalaı baıqaýǵa bolatyny jaıly keńesterdi de "Ana men baladan" kórip júrmiz.
Máselen, atalǵan baǵdarlamynyń kezekti bir sanynda tórt tildiń álipbıin jatqa biletin Beıbarys Dúısen esimdi 4 jastaǵy bala anasymen birge stýdıa qonaǵy boldy. Bala qabileti kógildir ekran aldynda keńinen ashyldy. Bar-joǵy 4 jasta bolsa da, qazaq, orys, aǵylshyn jáne arab tilderiniń álipbıin jatqa biletin ári ony asa úlken jyldamdyqpen áspettep jaza alatyn «výnderkınd» balanyń qabileti jurtty súısindirdi. Anasy Botagózdiń aıtýynsha, Beıbarys alǵashqyda aǵylshyn tiliniń álipbıin meńgergen. Oǵan áser etken Youtube jelisindegi álipbı úıretetin beınejazbalar bolsa kerek. Keıinnen qazaq tiliniń álipbıin meńgergen jetkinshek, tilde 42 árip baryn aıtyp, ony stýdıa taqtasyna esh kidirmesten jazyp berdi. Álemdegi qıyn til ári álipbıi de meılinshe kúrdeli sanalatyn arab álipbıindegi 28 tańbany esh qınalmastan atap, jazyp bergen Beıbarystyń qabileti aqıqatynda tań qalyp, tańdaı qaǵýǵa turarlyq. Anasy Botagózdiń aıtýynsha, arab tiliniń álipbıin úırenýge meılinshe sebep bolǵan, «Asyl arna» telearnasy eken. Balaǵa telearnany, Youtube jelisin qosyp beretin ata-ana Beıbarystyń álipbıdi óz betinshe birden oıǵa toqyp alatynyn aıtyp aǵynan jaryldy.
Otandyq telearnada otbasylyq-tanymdyq baǵdarlama retinde kósh ilgeri kele jatqan "Ana men bala" baǵdarlamasy búginde Beıbarys sıaqty talaı balanyń talantyn tanytyp qana qoımaı, qazaq halqynyń salt-sana, mádenıetin tý ǵyp ustap, otbasylyq qundylyqtardy teleekran arqyly nasıhattaıdy, ana men balaǵa qajet keńester aıtylyp, tájirıbeler kórsetiledi. Ár aptanyń seısenbi, sársenbi jáne beısenbi kúnderi «Habar» telearnasynan ekranǵa jol tartatyn bereri mol baǵdarlama kez kelgen ata-anaǵa bala tárbıesinde kómekshi, kez kelgen kórermenge turmystyq máselelerdiń jaı-kúıinen barynsha keń aqpar beretin, tanym kókjıegin arttyratyn tyń joba. Otbasylyq qundylyqtardy nasıhattaı júreıik!
Qazirgi buqaralyq mádenıet keń etek jaılaǵan zamanda otbasy, ata-na men bala qatynasyn, qoǵamdaǵy zerek balalardyń talantyn elge tanytýdy maqsat tutqan atalmysh baǵdarlama qoǵamǵa kerek-aq. Jeńil ázilge, arzan kúlkige negizdelgen jobalardan sharshaǵan kórermen mundaı baǵdarlamaǵa shóldedi. Qazirgi naryq zamanynyń jeteginde ketip otbasy qundylyǵy, mahabbat, qamqorlyq sekildi jyly sezimderge zárý halyqqa «Ana men bala» sekildi joba aýadaı qajet. Ataýynyń ózinen ómirdegi eń asyl adamdardyń bir-birine degen sheksiz mahabbatynyń lebi esip turǵandaı. Túptep kelgende ómirdegi eń ystyq ta, mahabbatqa toly pana ol - otbasy. Al ana sol otbasy atty kishigirim álemniń berekesi.
