Búgin, 26 qazanda Elbasy Prezıdent Ákimshiliginiń Basshysy Ádilbek Jaqsybekov pen Prezıdent Ákimshiligi Basshysynyń birinshi orynbasary Marat Tájındi "Latyn qarpine negizdelgen qazaq álipbıiniń usynylǵan jobasyn bekitý týraly" sheshimdi qabyldaý kerektigin tapsyrdy. Esterińizge sala keteıik, bul týraly Qamshy.kz aqparat agenttigi jazǵan bolatyn.
Osy kezdesýde Nursultan Nazarbaev latyn qarpine negizdelgen qazaq álipbıiniń sońǵy jobasy qyzý talqylanyp, qoǵam tarapynan qoldaý tapqanyn atap ótken edi. Prezıdent sózinen úzindi keltirsek:
"Latyn qarpine negizdelgen qazaq álipbıiniń usynylǵan jobasyn bekitý týraly jarlyq shyǵarý qajet. Komısıa jumysyn aıaqtady. Sońǵy nusqa jarıalandy. Ǵalymdar, tiltanýshylar, saıasatkerler, jastar jáne Qazaqstan halqy Assambleıasynyń ókilderi ortaq mámilege keldi. Jalpy, qoǵam qoldap otyr", – dedi Qazaqstan Prezıdenti.
Bul neni bildiredi? Búgingi kúngi kezdesý qoǵamda qyzý pikirtalastar týdyrǵan latyn álipbıiniń taǵdyryn sheshken tarıhı kún bolǵany ma? Bul suraqtar boıynsha, saıasatker, Erlan Karın óz paraqshasynda pikirin bildirdi:
"Qalaı bolǵanda da bul sheshýshi sát. Árıne, unatatyndar da unatpaıtyndar da bolady, báriniń kóńilinen birdeı shyǵý múmkin emes, ony talqylaýdyń barysynda da kórdik. Buryn aıtqanymdaı, birde bir elde til reformasy, álipbı aýystyrý máselesi osyndaı keń túrde talqyǵa salynbaǵan bolatyn. Degenmen, qazirgi qabyldanyp jatqan sheshim - elimizdiń damýyndaǵy túbegeıli betburys. Tipti bul táýelsizdikti ıelengennen keıingi tarıhı mańyzdylyǵy jaǵynan ekinshi úlken qadam dep aıtar edim. Sebebi bul bizdiń órkenıettik tańdaýymyzdyń naqty kórinisi. Qalǵany óz qolymyzda - búgin latyn álipbıiniń qabyldanýy erteń aq birden onyń qoldanysqa engiziletinin bildirmeıdi. Alda 8 jyl qyrýar jumys kútip tur. 2025 jylǵa deıin erejesi, ádistemesi daıyndalady. Sondyqtan, qalǵanyn ǵalymdar asyqpaı, tıanaqty saraptap jasar. Eń bastysy, negizgi baǵyt aıqyndaldy!" -dedi ol.
Nursultan Nazarbaev atap ótkendeı, "qazaq álipbıin latyn qarpine kezeń-kezeńmen jáne júıeli túrde kóshirýdiń mańyzy zor". Latyn álipbıiniń sońǵy usynylǵan jobasy maquldanǵanǵa uqsaıdy. Degenmen, keler ýaqytta bul málimdemeniń rastyǵyna áli de kóz jetkizý kerek.
