Rejıser Sábıt Qurmanbekovtiń «Oralman» kórkem fılmi Italıada ótken HH Halyqaralyq «Religion Today» («Búgingi din») kınofestıvalinde «Úzdik fılm» júldesimen marapattaldy dep habarlaıdy Qamshy.kz aqparat agenttigi. Sonymen qatar, atalǵan týyndy SIGNIS táýelsiz qazylar alqasynyń arnaıy júldesine qol jetkizdi (Komýnıkasıa jónindegi álem katolıkteri asosıasıasynyń júldesi).
Qazaqstan Respýblıkasy Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdıasy túsirgen atalmysh fılm týǵan jerinen ketýge májbúr bolǵan, alaıda ondaǵan jyldar ótken soń Aýǵanstannan eline qaıta oralǵan qandastarymyz jaıly baıandaıdy.
Bıyl halyqaralyq «Religion Today» kınofestıvaliniń negizgi baıqaýynda 28 elden 41 tolyqmetrajdy kartına baq synady. Festıváldiń úzdik fılmderin halyqaralyq qazylar alqasy anyqtady. Olardyń quramynda rejıser Bendjamın Freıdenberg, serbıalyq rejıser Goran Radovanovıch, «Kınodaǵy bosqyndardyń úni» baǵdarlamasynyń dırektory Bernadett Shramm jáne basqalar.
Festıváldiń Bas júldesi ıtalıalyq rejıser Ermanno Olmanyń «Kórdińder me, men de sender sıaqtymyn» atty kartınasyna buıyrdy. «Úzdik qysqametrli fılm» júldesin Lýıza Roýzdyń «Chop» fılmi ıelendi, al «Úzdik derekti fılm» júldesi ırandyq rejıser Berýz Nýranıpýrdyń «A 157» atty fılmine berildi.
Odan bólek, festıválde halyqaralyq qazylar alqasymen birge SIGNIS táýelsiz qazylar alqasy jumys istedi. Onyń quramynda Matteo Astı (Italıa), Gýıdo Konventes (Belgıa), Blanka Marıa Monzon (Argentına) jáne Magalı Van Reet (Fransıa) boldy.
Táýelsiz qazylar alqasynyń músheleri «Oralman» fılminiń rejıseri Sábıt Qurmanbekovke aıryqsha alǵystaryn bildirip, bylaı dedi: «Bul fılm Ortalyq Azıadaǵy eń keremet fılmderdiń biri. Qarıanyń atajurtyna degen mahabbaty ádemi beınelengen. Eger de ár bosqynnyń júreginde ata jurtqa oralýǵa degen úmit bolsa, qıyndyqtarǵa qaramastan, maqsatyna jete alady».
Esterińizge sala ketsek, «Oralman» kórkem fılmi osy jyldyń basynda
Irannyń astanasy Tegeranda ótken 35-shi Halyqaralyq Fadjr kınofestıvali men XIII Halyqaralyq «Eýrazıa» kınofestıvaliniń Bas júldesin jeńip alǵan bolatyn. Fılmde basty róldi somdaǵan akter Dýlyǵa Aqmolda qyrkúıek aıynda Tatarstanda ótken XIII Halyqaralyq musylmandar kınosy festıvalinde «Úzdik er adam róli» júldesimen marapattaldy.
Aıta ketsek, «Oralman» kórkem fılmi halyqaralyq prokatqa shyǵyp, shetelderde kórsetilip júr. Bul fılmdi birinshi bolyp Avstralıanyń talǵampaz kórermenderi tamashalady. Kelesi jyldyń basynan bastap «Oralman» fılmi Italıada prokatqa shyǵatyn bolady.
Fılm jaıly: Fılm HH ǵasyrdyń 30-shy jyldary qyzyl áskerdiń jendetterinen Aýǵanstanǵa qonys aýdarýǵa májbúr bolǵan qazaq otbasy týraly. Bas keıipker Bazarbaı qarttyń bir qyzy men uly sol jaqta dúnıege keledi. Balalary eseıip, otbasyn qurady. Uly Saparqul jergilikti pýshtýn ultynan kelinshek alady. Al qyzy aýǵan jigitine turmysqa shyǵady. Saparqul soǵys kezinde modjahetter jaǵynda soǵysady. Jyldar ótedi. Bazarbaıdyń otbasy Qazaqstanǵa kóshýge ruqsat beretin kvota alady. Barlyǵy jolǵa jınalady. Taýly qyshlaqtan shyqqan otbasyny uzaq jol kútedi.
