Sırıa jónindegi Astana prosesiniń barlyq tarapy Astanada 30-31 qazanda ótetin kezdesýge qatysatynyn rastady, dep habarlaıdy Qamshy.kz aqparat agenttigi Qazaqstannyń syrtqy ister mınıstrligine silteme jasap.

Reseı delegasıasyna RF prezıdentiniń Sırıa jónindegi arnaıy ókili Aleksandr Lavrentev, Túrkıa delegasıasyna syrtqy ister mınıstriniń orynbasary Sedat Onal, Iran delegasıasyna syrtqy ister mınıstriniń orynbasary Hýseın Djaberı Ansarı basshylyq etedi.

Aldaǵy kezdesýge Sırıa úkimetiniń jáne sırıalyq opozısıanyń, sondaı-aq baıqaýshy retinde BUU, AQSH jáne Iordanıanyń ókilderi qatysady.

İs-sharanyń bastalýynan bir kún buryn kepilger-elderdiń ókilderi sarapshylar deńgeıinde ekijaqty jáne úshjaqty konsýltasıalar ótkizýge nıetti. Jalpy otyrys barlyq taraptyń qatysýymen 31 qazanda ótedi.

Aldaǵy kezdesý Sırıada urys is-qımyldaryn doǵarý rejımin nyǵaıtý boıynsha qol jetkizilgen nátıjelerdi saqtaýǵa, sondaı-aq daǵdarysty saıası retteýge ótý kezeńinde atalǵan eldegi jaǵdaıdy ári qaraı turaqtandyrý sheńberinde kúsh-jigerlerdi arttyrýǵa baǵyttalǵan.