Qazaqstanda latyn grafıkasyna negizdelgen jańa qazaq álipbıi bekitildi. 27 qazan kúni memleket basshysy Nursultan Nazarbaev tıisti jarlyqqa qol qoıǵan. Almaty qalasynyń qoǵamdyq uıymdary qazaq álipbıiniń bekitilgen nusqasyn tolyqtaı qoldaıdy, dep habarlaıdy Qamshy.kz aqparat agenttigi. «El-shejire» qoǵamdyq qorynyń tóraǵasy D.Áshimhannyń aıtýynsha, latyn álipbıi Qazaqstan men damyǵan elderdiń arasyn jalǵaıtyn kópir ispetti.
«QR Prezıdenti Nursultan Nazarbaev qazaq tili álipbıin kırıllısadan latyn grafıkasyna kóshirý týraly Jarlyqqa qol qoıdy. Biz latyn ǵarpine kóshkennen ne utamyz? Birinshiden, álemdik ıntegrasıaǵa umtylyp jatqan el bolǵandyqtan, álipbıdi de birizdendirý burynnan kún tártibinde turǵan másele edi. Endi sol máseleni is júzinde sheshýge kiristik. Ekinshiden, tarıhı jazba muralarymyzdy súzgiden ótkizýge múmkindik týdy. Úshinshiden, qazaqstandyqtar latyn álipbıin qoldanýǵa psıhologıalyq turǵydan daıyn. Elimiz naryqtyq ekonomıkaǵa kóship, jańa elektronıkalyq qurylǵylar engen kezden-aq, jurt latynsha jazýdy birtindep bastap ketti. Adamdarǵa latyn ǵarpin eshkim úıretpese de, olar qalta telefondary arqyly hat-habarlardy latynsha jaza bastady. Tórtinshiden, latyn ǵarpine ótý Alash qaıratkerleriniń de armany bolǵan edi. Ahmet Baıtursynuly jasaǵan nusqa bárimizge málim. Bıyl Alashorda Úkimetiniń qurylǵanyna 100 jyl tolyp jatqan kezde, latyn álipbıine ótýimiz jaqsylyqtyń nyshany. Qalaı bolǵanda da, 27-qazan kúntizbege tarıhı kún bolyp eneri sózsiz. Latyn álipbıine kóshý kezeń-kezeńimen iske asatynyn da este ustaǵan abzal. Sondyqtan, bul máselede asa kóp qıyndyqtar paıda bolady dep oılamaımyn», - dedi D. Áshimhan.
Al «Aıajan» kolejiniń dırektory K. Qurymbaeva Elbasynyń Jarlyqqa qol qoıýyn ana tilimizdiń keleshegi úshin jasalǵan ǵylymı-áleýmettik máni zor batyl sheshim dep tanydy.
«Elimiz Táýelsizdik alǵannan bastap kóptegen ıgi isterdiń uıytqysy bolyp kelesiz. Jyl saıynǵy Qazaqstan halqyna jasalǵan Joldaýlar men aýqymdy strategıalyq baǵdarlamalaryńyz elimizdi álemniń damyǵan 30 eliniń qataryna qosylý úshin jasalyp jatqan aýqymdy is-sharalardyń biri. Elbasynyń taǵy bir mańyzdy bastamalarynyń biri jáne ana tilimizdiń keleshegi úshin jasalǵan ǵylymı-áleýmettik máni zor batyl sheshimge qoldaý bildirip, ulttyq tilimizdiń dybystyq erekshelikterin tolyqqandy kórsete alatyn álipbıdi tańdap, tarıhymyzdy taǵy bir jańalyqpen tolyqtyrdyq. Endeshe, 2017 jyldyń 26 qazany Qazaqstan úshin tarıhı, el táýelsizdiginiń tarıhynda altyn áriptermen jazylatyn aıryqsha kún bolyp, ulttyq til ereksheligine negizdelgen jańa grafıka qabyldandy, memlekettik mártebesi bar tilimiz úshin serpindi sát týdy. «Qazaq tili álipbıiniń kırıllısadan latyn grafıkasyna kóshirilýin qamtamasyz etý Jarlyǵyn», qazaq tili álipbıiniń 2025 jylǵa deıin latyn grafıkasyna kezeń-kezeńimen kóshýin qamtamasyz etý úshin aýdanymyzda is-sharalar ótkizý maqsatynda bastamany «Qazaq tili» qoǵamdyq birlestigimen birlese otyryp qolǵa aldyq», - dedi «Aıajan» kolejiniń dırektory.
Qazaq álipbıiniń bekitilgen nusqasyn «Adyrna» ulttyq-etnografıalyq birlestigi» qoǵamdyq qorynyń dırektory A.Áýbákir de qoldady.
«Adyrna» ulttyq-etnografıalyq birlestigi» qoǵamdyq qory Elbasy Nursultan Ábishuly Nazarbaevtyń latyn álipbıine ótý jaıyndaǵy bastamasyn qoldaıdy. Bul dúnıejúzi qazaqtarymen ortaq til tabysyp, qazaq eliniń birligin nyǵaıtýǵa jasalǵan úlken qadam retinde baǵalaımyz. Sonymen birge, týystas túrik halyqtarymen da yntymaqtastyq máselesine oń yqpal etedi dep senemiz. Bir kezderi latyn álipbıi qazaq jerinde qoldanysta bolǵan. Onyń ústine, elimizde aǵylshyn tilin jetik biletin jastar ósip keledi. Olarǵa latyn álipbıine beıimdelý asa qıyndyq týǵyza qoıar dep oılamaımyz. Bul bizdiń Táýelsizdigimizdi bekite túsetin qadam dep esepteımiz. Tańdalyp alynǵan álipbı nusqasy buǵan deıingi nusqalarǵa qaraǵanda áldeqaıda joǵary deńgeıde ekeni baıqalady», - dedi A. Áýbákir.
