Soltústik Koreıa búginde jabyq esik saıasatyn ustanatyn ózi týraly eshkimge málimet bermeıtin jabyq elderdiń biri. Alaıda, KHDR  endi tek Ortalyq telegraftyq agenttik arqyly emes, zamanaýı vıdeorolıkter formaty arqyly  ózi týraly nasıhattyq aqparattar beretin boldy.

Soltústik Koreıanyń elshiligi memleket týraly nasıhattyq vıdeolarmen qosa, «Hvason» balıstıkalyq zymyranyn ushyryp Vashıngtonǵa «soqqysy» beınelengen vıdeony Lenta.rý redaksıasyna jibergen dep habarlaıdy Qamshy.kz aqparat agenttigi.

«Hvason» zymyrany ushyrylǵany beınelengen vıdeo kompúterlik grafıkamen  montajdalǵan. Vıdeoda  zymyran Aq úıge qaraı baǵyttalyp sonda jarylady. Bul vıdeo arqyly Soltústik Koreıa óziniń kúshin kórsetip, AQSH-qa, búkil álemge ses kórsetken syńaıly.

Soltústik Koreıa jarıalaǵan vıdeo toptamasynda mańyzdy tarıhı oqıǵalarǵa baılanysty beınejazbalar da bar. Sonyń ishinde, Koreı halyq armıasynyń amerıkandyq tyńshy kemesin basyp alýyn aıtýǵa bolady. Myna vıdeoda «Pýeblo» kemesi týraly aıtylady. Phenánnyń aıtýynsha, «Pýeblo» Soltústik Koreıa aýmaǵyna basyp kirgen, al AQSH bul málimetti joqqa shyǵarǵan.

Sonymen birge, Phenán óziniń zamanaýı ınfraqurylymymen, onyń ishinde áýejaıymen maqtanǵysy kelgen syńaıly. Jarıalanǵan vıdeo toptamasynda áýejaıdyń jańa ǵımaratynyń beınejazbasyn kórýge bolady.