Almaty oblysynda Narynqol aýdany qurylady. Bul týraly Astanada ótken OKQ brıfıńinde oblys ákimi Amandyq Batalov málimdedi, dep habarlaıdy Qamshy.kz aqparat agenttigi.

"Oblysta jańa aýdan qurylatynyn qýana habarlaımyn. Sheshim qabyldanyp qoıdy. Úkimettiń qaýlysy, Elbasynyń sheshimi shyqqannan keıin qýanyshty jańalyqty halyqqa jetkizemiz. Usynys bizden bolǵan edi. Narynqol ákimshilik aýdanyna barǵanymyzda, jastardyń bári aýyldy tastap ketken, Almatyda bazar mańyn jaǵalap, jumyssyz júr. Osydan keıin ol jerde Narynqol aýdanyn qurý týraly usynys jasadyq. Shekarasyn bólip, kórsetip qoıdyq, tek prosedýralyq jumystar qaldy. Sodan keıin sheshim qabyldanady. Biz komısıa quryp, Narynqoldaǵy mekemelerdi aralap, jaǵdaıdy kórip qaıttyq. Kelesi jyldyń búdjetine sonyń bárin engizip, josparlaýymyz kerek", — dedi ákim. 

Esterińizge sala ketsek, osy jazda Almaty oblystyq máslıxatynyń otyrysynda QR Úkimetine Almaty oblysynyń quramynda ákimshilik ortalyǵy Narynqol aýyly bolatyn jáne Almaty oblysy Raıymbek aýdanynan jer bólý arqyly jalpy aýdany 711 937 gektar bolatyn jańa aýdan qurý týraly usynys berilgen edi. Respýblıkalyq onomastıkalyq komısıanyń qaraýyna jańadan qurylǵan aýdanǵa «Narynqol» ataýyn berý týraly usynys jiberildi.