Erazmýs+ baǵdarlamasynyń Tórtinshi baıqaýynyń jarıalanýy aıasynda 2017 jyldyń 2 qarashasynda Almaty qalasy, Halyqaralyq Bıznes ýnıversıtetinde (UIB) «Erazmýs+ baǵdarlamasynyń Aqparattyq kúni» ótkizilip jatyr,-dep Qamshy.kz aqparat agenttigi habarlaıdy.
Ótkizilip otyrǵan is-shara barysynda Qazaqstannyń joǵary oqý oryndary men basqa múddeli taraptardyń ókilderin jańa baıqaýdyń sharttarymen, irikteý tártibimen, ulttyq jáne óńirlik basymdyqtarymen tanystyryldy.
Onymen qosa, Erazmýs+ baǵdarlamasynyń sharalaryna qatysýǵa qyzyǵýshylyq bildirgenderge tilek-keńes berildi. Bul is-sharany QR Bilim jáne ǵylym mınıstrligi, Eýropalyq Komısıanyń Bilim berý, aýdıovızýaldy quraldar men mádenıet jónindegi Atqarýshy Agenttigi (EASEA), Qazaqstandaǵy Eýropalyq Odaq Ókildigi jáne Qazaqstandaǵy Erazmýs+ baǵdarlamasynyń Ulttyq keńsesi birlesip uıymdastyrýda.
Baǵdarlama bıyl óziniń 30 jyldyǵyn atap ótýde. EO-tyń eń tabysty baǵdarlamalarynyń biri retinde keńinen tanylǵan Erazmýs+ baǵdarlamasy 9 mıllıonnan astam tikeleı qatysýshylardyń ómirin baıyta otyryp, eýropalyq ıntegrasıanyń jáne halyqaralyq baılanystyń jaǵymdy áseriniń naqty mysaly. Búkil álemde ótkiziletin birqatar is-sharalardyń biri retinde, Qazaqstandaǵy Erazmýs+ baǵdarlamasynyń Aqparattyq kúni Baǵdarlamanyń jetistikterin atap ótýge arnalǵan.
Aqparattyq kúnge QR Bilim jáne ǵylym mınıstrliginiń, Qazaqstan Respýblıkasynyń elshilikteriniń jáne basqa da halyqaralyq uıymdardyń ókilderi qatysýda. Sonymen qatar is-sharaǵa Eýropalyq Odaqtyń Qazaqstandaǵy delegasıasynyń yntymaqtastyq bóliminiń basshysy Iohannes Stenbek Medsen qatysty.
Erazmýs+ baǵdarlamasy jóninde
«Erazmýs+ baǵdarlamasy» Eýropalyq Odaq qarjylandyratyn bilim berý, jastar jáne sport salasynda belsendilik pen utqyrlyqty qoldaıtyn baǵdarlama. Baǵdarlama óziniń múmkindikterin joǵary oqý oryndarynyń stýdentteri men qyzmetkerleri úshin jáne búkil álemdegi mekemeler úshin usynady. Baǵdarlama jańa oqý baǵdarlamalar, oqý-ádistemeler jáne oqý-ádistemelik materıaldar ázirleý jáne engizý arqyly seriktes elderdegi bilim berý júıesin jańǵyrtý boıynsha jobalardy júzege asyrady. Erazmýs+ baǵdarlamasy stýdentterge, sondaı-aq, bilim berý mekemeleriniń profesorlary men ákimshilik qyzmetkerlerine basqa elderde bilim alý jáne/nemese kásibı tájirıbe alý úshin múmkindik beredi.
İs-sharada spıkerleri men qarastyrylǵan máseleler:
Baǵdarlamanyń ótýine úles qosyp, oǵan tóraǵalyq etken Halyqaralyq Bıznes Ýnıversıtetiniń rektory, Ahmed-Zakı Darhan Jumaqanuly atalmysh baǵdarlama jóninde qatysýshylarmen mańyzdy málimetpen bólisti. QR Bilim jáne ǵylym mınıstrligi – Narbekova Baný Mýhataevna, QR BǴM joǵary jáne joǵary oqý ornynan keıingi bilim berý departamentiniń bilim berý mazmuny men ádistemesi basqarmasynyń bastyǵy, JBRS tobynyń múshesi de aqparat kúninde boı kórsetti.
QR-ǵy Eýropa Odaǵynyń ókildigi - Seriktestik bóliminiń basshysy Iohannes Stenbek Madsen: «Erazmýs+ baǵdarlamasy 2014-2020 jyldar aralyǵyn qamtıdy, bul baǵdarlama EO-dan basqa memleketterdiń jastaryna de bilim almasýǵa, oqýǵa, úıretýge negizdelgen. Qazaqstan memleketi Eýropalyq Odaq seriktesteri arasynda aldyńǵy orynda tur»,-dedi.
Qazaqstandaǵy Fransıanyń bas konsýldyǵy – Ýnıversıtettegi seriktestik jónindegi attashe Jıl Mames: «Qazaqstan oqý baǵdarlamalaryn damytýda orasan zor úles qosyp keledi, sondyqtan bizder ortaq til tabysyp kelemiz. Bul jerge biz sizderdi qoldaý úshin suraqtaryńyzǵa jaýap berý úshin kelip otyrmyz, olaı bolsa bizdi qoldanyp, kerekti aqparatty bilip alyńyzdar»,- dep sózin aıaqtady.
Qazaqstandaǵy Erazmýs+ baǵdarlamasynyń Ulttyq Keńsesi (EUQ) Tasbolatova Shaızada Ómirzaqqyzy, Erazmýs+ baǵdarlamasynyń ulttyq úılestirýshisi: «Erazmýs+ baǵdarlamasynyń 4-shi ret uıymdastyrylǵan saıys bastalyp ketti. Bizdiń maqsatymyz osy konkýrsqa qyzyǵýshylyq bildirgen oqý-oryndaryna kerekti aqparatpen bólisý. Bul konkýrsqa qatysý úshin qujattardy 8 aqpanǵa deıin tapsyrý kerek. Al onyń nátıjesi tamyz aıynda jarıa bolmaq. Buǵan deıinÁzirshe, Qazaqstan Orta Azıa memleketteri arasynda Erazmýs+ baǵdarlamasy boıynsha eń kóp grantqa ıelengen el bolyp qala beredi»,-dedi.
Erazmýs+ baǵdarlamasy boıynsha oqýǵa tapsyrǵysy keletinder nazaryna:
Osy baǵdarlama boıynsha oqýǵa túskisi keletin talapkerler Qazaqstandaǵy Erazmýs+ baǵdarlamasymen jumys isteıtin oqý oryndary arqyly qujattaryn tapsyra alady. Búginde bul baǵdarlamany qoldanatyn birqatar qazaqstandyq oqý oryndary bar, olar: QazUÝ, Gýmılev atyndaǵy Eýrazıalyq ulttyq ýnıversıteti jáne kóptegen basqa qalalardaǵy ýnıversıtetter de kiredi, tolyq tizimdi myna silteme arqyly kóre alasyz: http://www.erasmusplus.kz/index.php/ru/edukaz/uni-s.
Qosymsha aqparat alý úshin, Qazaqstandaǵy Erazmýs+ baǵdarlamasynyń ulttyq úılestirýshisi Shaızada Tasbolatova hanymǵa (tel.: + 7 (727) 311-86-45, neo@erasmusplus.kz) jáne Qazaqstan Respýblıkasyndaǵy Eýropalyq Odaq Ókildigi baspasóz hatshysy Elnara Baınazarova hanymǵa (tel.: + 7 (7172) 9745-67, Elnara.BAINAZAROVA@eeas.europa.eu) habarlasýǵa bolady. Baǵdarlama jóninde tolyq aqparat alǵyńyz kelse myna silteme boıynsha, resmı saıtty qarańyz: http://www.erasmusplus.kz/index.php/kz/.
