QR Bilim jáne ǵylym mınıstri Erlan Saǵadıev Parıjde IýNESKO-nyń Bas konferensıasynyń 39-shy sesıasyna qatysyp, sóz sóıledi, dep habarlaıdy QR Bilim jáne ǵylym mınıstrliginiń baspasóz qyzmeti.
Kezdesýge álemniń 100-den astam memleketiniń bilim mınıstrleri jınalǵan. IýNESKO sesıasynyń negizgi maqsaty – bilim mazmunyn jańǵyrtý, salanyń jahandanýy men údemeli ınternasıonalızasıasy ǵalamdyq kózqarastaǵy jáne osyndaı jaýapkershiligi bar qazirgi zamanǵa saı jańa býyn qalyptastyrýdaǵy negizgi trendter bolyp otyr.
QR Bilim jáne ǵylym mınıstri Erlan Saǵadıev óz sózinde Qazaqstannyń bilim salasyndaǵy ornyqty damý maqsattary men ıntegrasıalyq úderisterdi qoldaıtynyn aıtty. Ol Astanada ótken "EHRO-2017" halyqaralyq kórmesiniń jetistikterin aıta kele, onyń negizinde BUU-nyń bes agenttikteriniń qoldaýymen qyzmetin únemi jalǵastyratyn Halyqaralyq "jasyl" tehnologıalar jáne "bolashaqtyń energıasy" ortalyǵyn quryp jatqany jóninde málimdedi.
Saǵadıev kórmeden keıingi kezeńde Islam yntymaqtastyq uıym múshe elderiniń ǵylymı zertteýler men bilim salasyndaǵy jobalardy birlesip júrgizý jónindegi sheshimdi Astanada ótkizilgen alǵashqy Ǵylym jáne tehnologıalar jónindegi samıtiniń nátıjesi retinde atap ótti.
Bilim salasynyń damý barysy týraly baıandaǵan mınıstr mektepterdiń joǵary synyptary men kolejderde aǵylshyn tiliniń pándik deńgeıde engizý josparlary týraly aıtty. Sonymen qatar ol elimizdegi joǵary oqý oryndarynyń akademıalyq jáne basqarý eriktigi edáýir keńeıetindigi týraly málimdedi – bul bilim baǵdarlamalaryn quryp, basqarýdyń tıimdi tásilderin endirýge múmkindik berip, Qazaqstannyń Ortalyq Azıa aımaǵyndaǵy bilim ortalyǵyna aınalýyna septigin tıgizedi.
Erlan Saǵadıev eldegi JOO-na sheteldik stýdentterdi tartý jáne ulttyq kásibı standarttar jáne biliktilik qurylymyn halyqaralyq deńgeımen sáıkestendirý qajettigi máselelerin qozǵap, Qazaqstannyń IýNESKO aıasynda jasalyp jatqan barlyq bastamaǵa qatysýǵa daıyn ekendigin jetkizdi.
