«Elbasy kýrstastary» qory búginde prezıdentimiz Nursultan Ábishuly Nazarbaevtyń júrgizip otyrǵan saıasatyn nasıhattaý, el men Elbasy arasynda dáneker bolý baǵytynda birqatar jumystar atqarýda. Qor jumysynyń basy-qasynda júrgen Elbasymyzdyń kýrstasy Ermentaı Saparbaevpen bolǵan suhbatymyzda el jaıy, Elbasynyń ǵıbratty ómiri týraly áńgime qozǵadyq.

—Ózińizdi Elbasynyń kýrstasy retinde tanımyz. Sol tanystyǵyńyz týraly aıta otyrsańyz.

Dnepredzerjnısk qalasyna komsomoldyq joldamamen bardyq. Bir apta ótkennen keıin bizdi mamandyqtarǵa bóldi. Nurekeń shoıyn qorytýshy mamandyǵyn tańdady. Men shoıynshy boldym. Tórt jyl boıy birge jumys istedik.

1961 jyly ákem qaıtys bolyp, elge qaıttym. Ákemdi jer qoınyna tapsyryp, jylyn ótkizip bolǵannan keıin Nurekeńe hat jazdym. «Osylaı da osylaı jaǵdaımen elge ketip edim. Endi qaıta oralsam bola ma?» degen ótinishimdi jerge qaldyrmady. Janyna jumysqa aldy. Sodan tórt jyl birge jumys istedik.

Nurekeń qamqor, uıydastyrý sheberligi keremet. «Jigitter, jumysty durys isteıik. Tártipti bolaıyq. Bizdi Qazaqstan kútip otyr» deıtin. Komsomol jumysynda da belsendi boldy.

—Bolashaq prezıdentti sol kezde anyq tanı aldyńyzdar ma?

Nurekeńniń daryn-qabiletiniń erekshe ekendigin sol kezdegi qatar júrgen azamattardyń barlyǵy baıqady. Kóshbasshylyq, uıymdastyrýshylyq qabiletine, alǵyrlyǵyna, kóregendigine tánti bolatynbyz. Kúni buryn barlyǵyn oılastyryp qoıatyn. Ysyrapqa jol bermeıtin.

—Ózińiz týraly aqparat bere ketseńiz.

Ákem sharýa bolǵan. Keıin birneshe jyl Leńgir qalasynyń shahtasynda jumys istedi. Oǵan deıin ujymdastyrý jyldarynda keńestik sharýashylyqty ornatýǵa kóp kómegin tıgizgen. Maldy asyldandyrý jumystaryna aralasqan. Shahtaǵa da zor eńbek sińirgen. Shahtanyń jylqylaryn maǵan baqtyrdy. Sonda shahtadaǵy jumysynyń shet jaǵasyn bilip óstik. Mamandyq tańdaýyma da sol kisiniń aqyl-keńesi kóp áser etti.

—Elbasy saıasatyn onyń kýrstas dostary qanshalyqty qoldap júr?

Elbasy saıasaty eldiń búgingi tynys, tirshiliginen anyq kórinip tur ǵoı. Qazaq balasy buryn bastan ótkermegen kúnder keship otyr. Óndiris te, ǵylym-bilim de óz retimen damyp jatyr. Jıyndarda, kezdesýlerde Elbasyna eldiń jaǵdaıyn jetkizip, el ishindegi ahýaldan habardar etip turamyz. Elbasy da kóńilindegi suraqtaryn qoıyp, oıymyzdy bildi. Ondaı jıyndarda jeke basymyzdyń jaǵdaıyn surap jatsa da áńgimemiz negizinen el jaıynda bolady. Osy turǵydan alǵanda Nurekeńe barlyq zamandastary tilekshi, elimizdiń tynysh bolýyn, osy baǵytymen damı bergenin qalaımyz.

Suhbattasqan: Erlan Tóleýbaı