Brıtanıa týmasy Tanıa Georgelastyń jasy 33-te. Onyń aıtýynsha, ol bala kezinen qurdastary men kórshileri tarapynan kóp qorlyq kórgen dep jazady Qamshy.kz aqparat agenttigi sheteldik BAQ-qa silteme jasap. 

«DAISH-tyń birinshi hanymy» terorıstik toptyń resmı múshesine turmysqa shyqqan. Ol otbasylyq ómiri jáne Brıtanıadan Sırıaǵa qalaı barǵanyn, AQSH-qa qalaı kelgenin aıtyp berdi.

— Men bala kezden násilshildikti kórip óstim. Kórshilerimiz nashar adamdar edi. Olar bizdiń terezemizdi jıi syndyryp tastaıtyn. Men ózimdi qoǵamnan alshaqtalǵan adam sekildi sezinetinmin. Men adamdardyń sazaıyn bergim keldi.

Onyń aıtýynsha, 2001 jyl 11-shi qyrkúıektegi terakti onyń radıkalızmge bet burýyna túrtki boldy.

— Meniń jasym 17-de boldy. Men ǵımarattardyń qalaı qulaǵanyn kórdim. Kelesi kúni mektepke bardym.

Birneshe jyldan keıin Tanıa Iraktaǵy soǵysqa qarsy mıtıńige qatysty. Tanıanyń aıtýynsha, onda tanystyq saıtynyń jarnamalyq paraqshasy taratyldy. Sol saıt arqyly ol Djonmen tanysqan. Djon AQSH-taǵy áskerı dáriger, polkovnık Tımotı Djordjelastyń balasy. Djon 1983 jyly dúnıege kelgen. 11-shi qyrkúıektegi teraktiden keıin ol mekteptegi oqýyn tastap, radıkaldy dinı aǵymǵa qyzyǵa bastaǵan.

2004 jyldyń qazan aıynda olar úılendi. Ol ýaqytta Tanıa júkti edi.

— Biz óz jerimiz bolǵanyn qaladyq. Balalarymyzdy adamdardy óltirýge úıretip, jıhad jasaǵanyn qaladyq.  

Tanıa men Djon 2013 jyly Sırıadaǵy DAISH-qa qosylýdy josparlady. Ol ýaqytta olardyń úsh balasy bar edi.

— Djon Sırıaǵa barǵysy keldi. Men áli daıyn emes ekenimdi aıttym. Balalar da óte kishkentaı edi. Ol ýaqytta men júktiliktiń besinshi aıynda edim, biraq biz balalarymyzdy alyp Sırıaǵa qashýdy uıǵardyq.

2013 jyldyń tamyz aıynda olar Sırıaǵa avtobýspen shyqty. Olar toqtaǵan úıde terezede, sý da, qunarly tamaqta bolmady. Birneshe kúnnen keıin Tanıa men balalary aýyra bastaıdy. Osydan keıin Tanıa men balalary AQSH-qa qashamyz dep sheshedi. Kúıeýi Sırıada qaldy. Tanıa balalarymen Tehasqa keldi.

— AQSH-qa jetkennen keıin ınternet arqyly er adamdarmen tanysa bastadym. «Meniń 4 balam bar. Kúıeýim ekinshi Ýsama ben Laden bolý úshin bizdi tastap ketti» dep jazdym. Maǵan 1300 jaýap keldi.

24 saǵattyń ishinde Tanıa IT qyzmetkeri Kreıgpen tanysty. Alǵashqy kezdesýde-aq ol burynǵy kúıeýi DAISH sodyry ekenin aıtqan.

Bastapqy kezde olar kezdesip júrdi. Biraq kóp ýaqyt ótpeı ekeýi birge turamyz dep sheshedi.

Kreıg Mınnesottada týylǵan. Tehasqa kóship kelgen.

Olar shirkeýge jıi barady. Tanıa radıkalızmge qarsy saıt qurǵysy keletinin aıtady. Ol burynǵy terrorısterge  kómegin tıgizedi dep senedi.

— Kóbi maǵan joly bolmaǵan adam retinde qaraıdy. Biraq men Sırıadan qashyp kete aldym. Men tirimin. Balalarym baqytty, densaýlyǵy jaqsy. Ómirime kóńilim tolady.