Oral qalasynda 2017 jyldyń 8 qarashasynan bastap SMSBUS – jolaqy tóleýdiń elektrondy júıesi iske qosylmaq. Bul týraly búgin BQO Óńirlik komýnıkasıalar qyzmeti alańynda ótken brıfıńte Oral qalalyq ákimdiginiń jolaýshylar kóligi jáne avtomobıl joldary bóliminiń basshysy Q.Mýhambetkalıev jáne «SMSBUS» kompanıasynyń ókili S.Idıatov málim etti dep habarlaıdy Qamshy.kz aqparat agenttigi.
«SMSBUS» júıesiniń eń basty ereksheligi – qala búdjetine, jolaýshylarǵa jáne avtobýs parkterine eshqandaı salmaq salmaıdy (mysaly, avtokólikke arnaıy qural ornatýdyń, jolaýshylar úshin tólem kartalaryn satyp alyp, oǵan turaqty túrde qarjy salyp otyrýdyń qajeti joq), tólem quraly retinde ár azamattyń qolyndaǵy derbes uıaly telefony ǵana qoldanylady.
Bólim basshysy Q.Mýhambetkalıev atap ótkenindeı, «SMSBUS» júıesi «dástúrli» qolma-qol tólem júıesine balama ǵana, ıaǵnı jolaýshy jolaqysyn qolma-qol da, uıaly telefony arqyly da nemese bank kartochkasy arqyly da tóleı alady.
«SMSBUS» kompanıasynyń ókili S.Idıatovtyń aıtýynsha, bank kartasy arqyly tólem jasaý úshin jolaýshy SMSBUS.KZ saıtyna kirip, banktik kartasyn tirkeýi tıis. (VISA ı Master Card, kez-kelgen bankte komısıasyz).
Endigi arada árbir qoǵamdyq kólikke SMS arqyly tólem jasaýdy túsindiretin jazbasha aqparat paraǵy japsyrylatyn bolady. Jolaqyny tóleý úshin jolaýshy kóliktiń kodyn (sandar) kórsete otyryp, 2505 qysqa nómirine (nómir Qazaqstanǵa ortaq, sms joldaý - tegin) SMS joldaıdy.
Elektrondy tólem qabyldanǵannan keıin jolaýshyǵa tólem jasalǵandyǵyn aıǵaqtaıtyn, SMS habarlama túrindegi «saýda chegi» (elektrondy bılet) beriledi.
