«Qazaqstan ańyzdary» jarnamalyq kampanıasy aıasynda, Qazaqstannyń qasıetti jerleri – Aısha bıbi kesenesi, Qoja Ahmet Iasaýı kesenesi jáne arheologıalyq qazbalar nátıjesinde tabylǵan eń tanymal jádiger «Altyn adam» tarıhy týraly túsirilgen beınerolıkter, ústimizdegi jyldyń 4 qarashasynan bastap BBC World News telearnasynda kórsetile bastady. Beınerolıkterdi QR Mádenıet jáne sport mınıstrliginiń tapsyrysy boıynsha BBC ókilderi jáne Sh.Aımanov atyndaǵy «Qazaqfılm» kınostýdıasy birlesip túsirgen dep jazady Qamshy.kz aqparat agenttigi.
Beınerolıkterdiń túsirilimderi ústimizdegi jyldyń qyrkúıek aıynda «Qazaqfılm» kınostýdıasynyń terıtorıasynda jáne Esik, Úshqońyr, Túrkistan, Qapshaǵaı qalalarynda ótken. Jobany túsirýge otandyq jáne sheteldik mamandar tartylǵan. Beınerolıkterge Ońdasyn Besıkbasov, Nurlybaı Esimǵalıev, Shuǵyla Saparǵalı, Aıan Ótepbergen, Dınara Baqtybaeva, Farıza Eskermes jáne basqalar túsken.
– Osy jyly kóktemde Prezıdent Nursultan Nazarbaev óz joldaýynda elimizdiń Úshinshi jańǵyrýyn oryndaý maqsatyndaǵy basty joba dep – «Qasıetti Qazaqstan» jobasyn ataǵan bolatyn. Ulttyq kodymyzdyń negizi bolyp tabylatyn, halqymyzdyń baı murasyn jáne mádenıetin nasıhattaý úshin, «Qazaqfılm» kınostýdıasy BBC World News telearnasymen birlese otyryp, «Qazaqstan ańyzdary» atty jarnamalyq kampanıany bastap ketti. Kampanıanyń basty maqsaty – syrtqy jáne ishki mádenı týrızmdi damytý. Ol óz kezeginde álemdik básekelestikke jol bastaıdy, - dedi Sh.Aımanov atyndaǵy «Qazaqfılm» kınostýdıasynyń vıse-prezıdenti Serip Jubandyqov.
Álemde monýmentterdiń turǵyzylý tarıhy umyt qalyp jatady. Keıde týrıserge nemese saıahatshyǵa monýmenttiń ózinen onyń turǵyzylý tarıhy qyzyqtyraq bolady. Jáne onyń mádenı jáne tarıhı eskertkish retindegi alatyn orny týraly da aqparat alǵysy keledi. Qazaq halqy kesenelerdiń boı kóterý tarıhyn saqtap keledi. Sonyń arqasynda bul arheologıalyq eskertkishter ulttyń shyn mánisindegi qundylyǵyna aınalady.
Altyn adam men qazaq halqynyń bir ańyzynda ushyrasatyn – jas jaýynger Altyn-Aıdarda uqsastyq bar. Bul rolıkte rejıserdiń konsepsıasy boıynsha Altyn adam men ańyzdaǵy Aıdardyń beıneleri bir sarynda óriledi.
