DAISH terorıstik toby turǵyndarǵa qatysty qandaı qatigez áreketterdi qoldanatyny belgisiz. Sırıada reportaj jasaý óte qaýipti. Sondyqtan jýrnalıser DAISH basyp alǵan jerlerge kóp bara bermeıdi. Alaıda óz ómirin qaterge tigip Sırıadaǵy jaǵdaı týraly aqparatty jýrnalıserge jetkizip otyrǵan turǵyndar bar. Bı-bı-sı korespondenti sońǵy úsh aıda Rakka turǵynymen habarlasyp turdy. Ol kúndelik jazady. Onda DAISH sodyrlary basyp alǵan qaladaǵy turǵyndardyń jaǵdaıy baıandalady.
Kýáger kúndeligi:
Búgin jeksenbi. Bul kúni biz ádette namazdan keıin dalaǵa jınalyp, uzaq áńgimelesetinbiz. Endi bulaı istemeımiz. Qoǵamdyq orynǵa kelgen kez kelgen adamdy DAISH-qa qarsy áreket etip júr dep aıyptaýy múmkin.
Men alańdaǵy bir top adamnyń janynan ótip bara jatyrmyn. Olarǵa jaqyndaǵym kelmeıdi. Sebebi bir top adamǵa bireýdiń basyn shaýyp jatqanyn kórýge májbúrlep jatqan bolar.
Joq! Qudaıǵa shúkir. Osy joly eshkimdi óltirmedi. Bir jynysty adammen baılanysqan adamdy jazalamaqshy eken.
Erteń men qaıta jumysqa baramyn. Jańa kún. Jańa apta. Bizdi qutqarady degen úmitpen jańa kúndi bastaımyn.
Men sizderge DAISH-tyń alǵash qalaǵa kelgen kún týraly aıtyp bergim keledi. Bul – analar kúni bolatyn. Men áskerı ushaqtyń dybysyn estidim. Birden úıge jettim. Sol kúni aǵalarym men ápkelerimniń basyn qosyp, shaǵyn otyrys jasamaq bolǵanbyz.
Men úıge taksımen jetkende aýany tútinniń ıisi jaılap ketti. Úkimettiń qorǵanys kúshi bizdiń kóshelerge bomba tastapty. Kóshede jedel járdem men qutqarýshylar júrdi. Biri ólgen adamdy úıindiniń astynan shyǵaryp alyp jatsa, endi biri jaralanǵandarǵa kómektesip jatty. Kórshilerimniń biri ata-anam jaralanyp, olardy ortalyq aýrýhanaǵa áketkenin aıtty.
Aýrýhanaǵa jetkende onda qan men ólimniń ıisi múńkip turdy. Edende kóz jumǵandardyń denesi jatty. Ata-anamyzdy solardyń arasynan tabyńdar dedi. Men ákemdi kórim. «Anańdy ana jerde emdep jatyr, biraq ol jerge ázirge barmańdar» degen daýys estildi. Eki saǵat ótti. Dáriger shyqty. Men oǵan jaralanǵan adamnyń meniń anam ekenin aıttym. «Onyń ómirin saqtap qala aldym, biraq onyń jaǵdaıy aýyr» dedi dáriger.
Kókónis pen jemis-jıdek satatyn kórshim maǵan qol ushyn berdi. Ol maǵan jumys usyndy. Men birden kelistim. Men dúkende otyryp daladan oq atylǵanyn estidim. Adamdardyń barlyǵy qasha bastady. Dosym meniń qolymnan ustap turyp DAISH-tyń qalany basyp alǵanyn aıtty.
Men dalada temeki shegip turǵanda buǵan deıin kórmegen beıtanys er adam kelip temeki tartýǵa tyıym salynǵanyn aıtty.
Áıelimmen kóshede kele jatsaq, bireý áıelderge paranjasyz júrýge bolmaıdy dep eskertý jasady.
Barlyq qalaǵa eki adamnyń ólim jazasyna kesilgeni habarlandy. Kóshede eki er adamnyń qolyn, kózderin baılaǵan. Maska kıgen adam úkim oqydy.
— Hasan! Úkimet jaǵynda kúresip júr. Jaza – basyn shabý. Aısa! Medıa belsendi. Sheteldik agenttermen sóılesti dep aıyptalady. Jaza – basyn shabý.
Olardyń bastaryn qylyshpen shaýyp aldy.
Men kóshede kele jatyp daýysymdy qatty shyǵaryp óz narazylyǵymdy bildirdim. Sol ýaqytta DAISH sodyrlary meni ustap aldy. Olar meni óz basqarmasyna áketti. Men ózimdi aqtaýǵa tyrysqanymmen ol áreketimnen esh nátıje shyqpady. Qyryq ret dúre sozý jazasy kesildi.
