«Seniń boıyńda tunyp turǵan talant bar, biraq tirińde «uly» degen sózdi estı almaı kettiń...»
Ómir... Mahabbat... Óleń... Talant... Bıikke umtylý... Quzǵa qulaý... Oryndalmaǵan arman... Aýrýhana... Jalǵyzdyq... Azapqa toly sońǵy kúnder... Ajal... Ólim...
Keshe aqıyq aqyn Muqaǵalımen etene jaqyn tanystym. Óleńderin oqyp, keıbirin jatqa bilgenimmen, taǵdyrymen paraq betinde ǵana tanysqanymmen, kóz aldyma elestetip kórmegem... Ǵabıt Músirepov teatryndaǵy «Men umytylmaımyn» qoıylymy meni aqynmen qaýyshtyrdy. Aýyr taǵdyryn sezindim, sol ýaqytta moıyndalmaǵan talanty meniń de janyma erekshe batty, ózi bıikte bola tura jalǵyz qalǵan Muqaǵalıdiń sońǵy kúnderin kórsetken qoıylym meni tereń oıǵa batyrdy.
Sol zamanda men bolsam ǵoı, shirkin... Onyń atyn tirisinde jaryqqa shyǵaratyn, álemge áıgili etetin, 1976 jyldyń 9 aqpanynda týǵan kúnin dúrkiretip ótkizetin, ulan asyr toı jasaıtyn.. Dál sol ýaqytta-aq aqynnyń jyrlary jastardyń aýzynan túspes edi, uly tulǵa óz zamanynda dárejesine saı baǵalanatyn edi, halqy onyń janynda bolatyn edi... Átteń, bári qur eles, bos qıal, qý saǵym bolyp qala berdi...
«Qaıtadan týsam, ór minezimmen ólimge emes, ómirge asyǵar edim» deıdi aqyn. Alaıda bári kesh edi... Aýrýhanada jatyp ákesimen syrlasty, Mýzasymen, dostarymen muńdasty, týǵan jerin Qarasazyn saǵyndy. Alaıda bári kesh edi ǵoı, kesh edi... Ajalymen qaı kezderde betpe-bet keldi, jeńýge tyrysty, qolynan kelmedi, sebebi ajal odan kúshtirek boldy.
«Men umytylmaımyn!» dedi... Aıtqany dál keldi. Búginde Muqaǵalıdiń jyryn boıyna sýsyndatyp ósken jas urpaqty bilemin, muzbalaq aqynnyń jyrymen tabysqan qos ǵashyqtardy bilemin. Alaıda kóńilimde ókinish sezimi qalyp qoıdy...
Gúlim JAQAN
