Oral qalasyndaǵy «Arba» qoǵamdyq birlestiginiń tóraıymy Gúlmıra Batpaqulova arbamen qozǵalatyn múmkindigi shekteýli ǵarip jandardyń muń-muqtajyn jaqsy biledi. Sondaı-aq ol múmkindigi shekteýliligine qaramastan jarystarǵa belsene atsalysady jáne óz arbasymen júzdegen shaqyrymdy júrip ótti, parashútpen de sekirgen bolatyn.
Sonymen qatar Gúlmıra Batpaqulova Batys Qazaqstan oblysynyń qoǵamdyq ómirine belsene atsalysady. «Qarsylastarymnan ozǵan jeńisime emes, óz-ózimdi jeńe alǵan tabysyma maqtanamyn», - deıdi Gúlmıra Batpaqulova. Keıipkerimizdi 17 jasynda kólik qaǵyp ketken. Sol jol apatynan keıin aıaǵynan turyp kete almaǵan. Ol qansha qıyndyq kórse de, moıymaǵan. Qaıta óz betinshe ómir súrýge beıimdelip, Oralda "Arba" qoǵamdyq birlestigin qurdy. Qazir ózi sıaqty múmkindigi shekteýli jandardyń jumys isteýine barynsha kómektesip keledi. Onyń aıtýynsha, búgingi tańda múmkindigi shekteýli jandardyń ómir súrý sapasyn kóterý máselesi júıeli sheshile bastaǵan.
«Qalanyń ınfraqurylymy múgedekter arbasymen qozǵalatyn adamdardyń barlyǵy úshin qoljetimdi boldy. Bizge jańa jaı berip, ortalyq ashtyq, onda qolóner, toqyma úıirmesi, kompúteri synyby, tigin sehy jumys isteıdi», - deıdi «Arba» QB tóraıymy Gúlmıra Batpaqulova. Qaısar jan qoǵamdyq birlestikti asha otyryp, jumys oryndaryn qurdy. Mysaly, búgingi kúni «Arba» qoǵamdyq birlestiginde densaýlyǵyna baılanysty 10 múmkindigi shekteýli adam eńbek etýde.
Qyzmetkerler bul jerde jumys isteı júrip, halyqqa qajetti buıym jasap, ózderin qajetsiz bolyp sezingen sezimderinen de arylǵandaryn aıtady.
-Ortalyqqa jumysqa turǵanǵa deıin men tuıyq adam boldym. Qazir burynǵaǵa qaraǵanda ashylyp, jurtpen tez til tabysa bastadym. Ortalyq meniń ómirimdi jaqsy arnaǵa qaraı buryp áketkenin tolyq senimmen aıta alamyn. Bul jerde ómirge jáne bir nárseni jasaýǵa degen ynta paıda bolady, - deıdi birlestiktiń qyzmetkeri Raýshan Súleımenova.
Gúlim AQAP,
Batys Qazaqstan oblysy
