Almatyda qala ákimi Baýyrjan Baıbek pen QR Mádenıet jáne sport mınıstri Arystanbek Muhamedıuly Elbasy kitaphanasynyń «N. Nazarbaev: dáýir, tulǵa, qoǵam» kóshpeli ǵylymı bilim berý jáne mádenı-aǵartýshylyq kórme jobasynyń ashylýyna qatysty, dep habarlaıdy Qamshy.kz aqparat agenttigi.

Uıymdastyrýshylardyń aıtýynsha, jobanyń is-sharalary Qazaqstan Respýblıkasy Tuńǵysh Prezıdentiniń Kúni jáne Táýelsizdik kúni memlekettik merekelerine oraı júzege asyrylady.

Elimizdiń astanasyn kóshirgen sátten beri 20 jyldyń ishinde alǵash ret Memleket basshysynyń Jeke arhıvi, Jeke kitaphanasy jáne Mýzeıi qorynyń zertteý nátıjeleri men materıaldary Almaty qalasynyń qalyń jurtshylyǵynyń nazaryna usynylyp otyr.

Kelýshilerdiń nazaryna kitaphananyń arhıvi, kitap, mýzeı qorlarynyń sırek jádigerleri, Elbasynyń joǵary memlekettik marapattary, Qurandar koleksıasy, ózge memleket basshylarynyń qoltańbasymen kitaptar, N. Nazarbaevtyń shet tilindegi kitaptary qoıyldy.

Joba atalmysh kóshpeli qor kórmesiniń saltanatty ashylý rásiminen bastaldy. Kórmeniń negizgi maqsaty – Qazaqstan Respýblıkasy Tuńǵysh Prezıdenti – Elbasynyń Táýelsiz Qazaqstan taǵdyryndaǵy rólin muraǵat qujattary men jádigerler arqyly júıeli túrde keńinen kórsetý bolyp tabylady.

Kórmeniń ashylý rásimine Qazaqstan Respýblıkasy Prezıdenti Keńesiniń bastyǵy – Qazaqstan Respýblıkasynyń Tuńǵysh Prezıdenti – Elbasy kitaphanasy dırektorynyń mindetin atqarýshy Mahmut Qasymbekov, Qazaqstan Respýblıkasynyń Mádenıet jáne sport mınıstri Arystanbek Muhamedıuly, Almaty qalasynyń ákimi Baýyrjan Baıbek syndy bedeldi azamattar qatysyp, sóz sóıledi.

Búgingi kórmege Astanadaǵy Elbasy mýzeıinen 800 túpnusqa qoljazba, sýretter jáne jeke zattary ákelindi.

«Almaty – Memleket basshysynyń tulǵasymen tikeleı baılanysty qala. Munda Qazaqstan táýelsiz memleket bolyp jarıalandy, Konstıtýsıa qabyldandy, Memlekettik rámizder bekitildi, Ulttyq valúta engizildi. Sondaı-aq, Qazaqstan Prezıdentiniń tuńǵysh saılaýy, alǵashqy ulyqtaý rásimi bolyp ótti. Sondyqtan, Elbasy kúni qarsańynda mundaı aýqymdy sharanyń ótýi – almatylyqtar úshin úlken mártebe», - dedi qala ákimi Baýyrjan Baıbek.

«Búgin QR Tuńǵysh Prezıdenti – Elbasy kitaphanasy úshin tarıhı kún. Sebebi, alǵash ret Elordamyz Almaty qalasynan Aqmolaǵa aýysqannan beri qundy derekter júıelenip, arnaıy kórmelik joba retinde almatylyqtarǵa jáne qala qonaqtaryna usynylyp otyr. Tórt taqyryp bóliktegi usynylǵan Tuńǵysh Prezıdent mýzeıiniń, jeke kitaphanasynyń, jeke muraǵatynyń jádigerleri kelýshilerge qalyptasqan Táýelsizdik tarıhymyzben qatar sol Táýelsizdiktiń basty jaýapkershiligin óz moıynyna artqan Elbasy ómirbaıanymen jáne syrtqy, ishki saıası qyzmetimen tereńinen tanystyratyn bolady. Bul – alǵashqy kórmelik aýqymdy joba.

QR Tuńǵysh Prezıdent mýzeıi men Elbasy kitaphanasy 2016 jylǵy 4 qarashadaǵy Elbasynyń jarlyǵy boıynsha birigip, qazirgi ýaqytta birlesken Táýelsizdik tarıhymyzdy jan-jaqty zerdeleý jáne kópshilikke, ásirese, jastarǵa jarıa etý qyzmetin jalǵastyrýda. Jalpy, kóshpeli kórmelerdi uıymdastyrý tájirıbesi osy kúnge deıin kásibı túrde qalyptasqanymen, aýqymdy, júıeli, sonymen qatar ishinde ǵylymı semınar-konferensıalary bar joba alǵash ret uıymdastyrylyp otyr», - deıdi QR Tuńǵysh Prezıdenti – Elbasy kitaphanasynyń dırektor orynbasary, tarıh ǵylymdarynyń kandıdaty Qaıypova Botagóz.

Belgili bolǵandaı, kóshpeli kórme Almatyda eki aı ýaqyt turady da, keıin Qaraǵandy men Shymkent qalalaryna ketedi eken.

Sonymen qatar, Mádenıet mınıstri men qala ákimi Elbasy Nursultan Nazarbaevtyń el damýyndaǵy róli jaıly ótetin ǵylymı praktıkalyq konferensıa jumysyna qatysady.