Almatyda komýnaldyq qyzmetke jańa tehnıkalar satyp alyndy. Shahar basshysy Baýyrjan Baıbek qysta qala kóshelerin tazalaıtyn arnaıy tehnıkalardy kórdi, dep habarlaıdy Qamshy.kz aqparat agenttigi QazAqparatqa silteme jasaı otyryp.

Búgin Almaty ákimi Baýyrjan Baıbek qala búdjetiniń esebinen komýnaldyq qyzmetke alynǵan jańa arnaıy tehnıkalaryn qarap shyqty. Bular «KAMAZ» shasıindegi quramaly 14 tazalaǵysh mashınalar, ótimdiligi joǵary «Unimog» úsh kópfýnksıonaldy tazalaǵysh kólik, eki «Snowbooster» qar tazalaıtyn mashınalar, konveıer-vakýýmdy «Dulevo» mashınasy, qar tazalaıtyn «16 Pony» mashınasy, 20 mınıtraktorlar men mınıtıegishter.

«Qalada jaıaý júrginshilerge jaǵdaı jasalyp jatyr. Demek, qysta trotýarlardy tazalaýǵa erekshe mán beriledi. Qalanyń tarıhı ortalyǵynyń úshten biriniń jańarýyna oraı arnaıy tehnıkalar - kópfýnksıonaldy «Pony» mashınasy, mını tıegishter, jeńil traktorlar alyndy. Jumysshylar aqaý keltirmeıtin quraldardy paıdalanatyn bolady», — dedi Tabıǵı resýrstar jáne tabıǵatty paıdalanýdy retteý basqarmasynyń basshysy Áset Masabaev. 

Áset Masabaevtyń aıtýynsha, qalada tazalanatyn joldyń jalpy kólemi - 20 mln sharshy metr. Qysta kóshe tazalaýmen 15 merdiger uıym, 1116 arnaıy tehnıka birligi aınalysady. Jol tazalaýmen aınalysatyn jumysshylar qataryn 1,2 den 2,7 myń adamǵa kóbeıtý kózdelgen.

«Bulardan ózge qala aýdandarynda óndiristik bazalar qurylǵan, sonyń arqasynda kóshe tazalaý jyldamdyǵy 1,5 esege artady. Jumysshylar shoǵyrlanatyn oryndarǵa olardyń kıimderin aýystyrýǵa, ystyq shaı iship, jylynýyna múmkindik beretin modýldi konteınerler qoıylady», — dedi ol.