Almatyda uıaly telefondy qýattap, Wi-Fi-ǵa tegin qosylýǵa bolatyn ınovasıalyq aıaldamalar ornatylady.
Almatyda «Science Slam - Kazakhstan» ǵylymı shoýy QR Tuńǵysh Prezıdenti qorynyń uıymdastyrýymen osymen úshinshi ótkizilip otyr. Búgin fınalǵa shyqqan 7 jas ǵalym aqyldy aıaldama, ınovasıalyq qoqysqana, shokolad prınteri týraly aıtty.
Science Slam - jas ǵalymdardyń stand up formatyndaǵy saıysy. Ár qatysýshy 10 mınýt ishinde óziniń ǵylymı jańalyǵyn jan-jaqty tanystyryp úlgerýi tıis.
Nátıjesinde, L.Gýmılev atyndaǵy Eýrazıa ulttyq ýnıversıtetiniń stýdenti Rafael Hısamýtdınov «Qatty turmystyq qaldyq konteınerlerin qashyqtyqtan basqarýdyń ıntellektýaldy júıesi» jobasymen birinshi oryn aldy.
Kúmis medalǵa ıe bolǵan Halyqaralyq Aqparattyq tehnologıalar ýnıversıtetiniń stýdenti Nurlan Kárimjanov kún energıasymen qýattandyrylatyn "ecoStation" aqyldy aıaldama ıdeıasyn usyndy.
Úshinshi orynǵa «Eýrazıa ekonomıkalyq odaǵy aıasynda tutynýshylar minez-qulqynyń kros-mádenı aspektileri» jobasymen Turan ýnıversıtetiniń stýdenti Gúlıra Abraeva laıyqtaldy.
«Inovasıalyq aıaldamada telefondy qýattaýǵa bolady. Ol úshin energıa kún batareıalarynan alynady. Túnde aıaldama jınaqtalǵan energıamen jaryqtanady. Sondaı-aq eki baqylaý kamerasy, tegin Wi-Fi, 42-dúımdy úlken ekran, «Sıtı-roýter-navıgator» bolady. Qala turǵyndary úsh tilde aqparat ala alady. Qalanyń bir buryshynan ekinshisine qalaı jetýge bolady, qandaı kórikti oryndar bar degen sıaqty. Biz aýa lastanýyn tym bolmasa 15-20%-ǵa azaıta alamyz dep senemin», - dedi Nurlan Kárimjanov.
Aıta ketý kerek, mundaı aıaldamalardyń biri qazir Jandosov-Manas kósheleriniń qıylysynda tur.
Qalada taǵy 6 aıaldama jasaý týraly kelissózder júrgizilip jatyr.
«Talantty jastardy, jas ǵalymdardy qoldaý maqsatynda N.Nazarbaev atyndaǵy qor tek grant taratýmen shektelip qalmaı «Science Slam» sıaqty mańyzdy sharalardy ótkizip keledi. Bul jastardyń arasynda ǵylymǵa, bilimge degen qushtarlyqty oıatý úshin júzege asyrylady. Bul ońaı jumys emes, árıne. Biraq úshinshi jyl qatarynan qatysýshylardyń deńgeıi artqanyn, jobalar sapasynyń jaqsarǵanyn atap ótýge bolady», - dedi Qordyń Almatydaǵy ókili Sergeı Toqtarov.
