Aqmola oblysynyń ákimi Málik Myrzalın Atbasar qalasyn qaıta sý basý qaýpi týraly máselege qatysty pikir bildirdi, — dep habarlaıdy Qamshy.kz aqparat agenttigi QazAqparatqa silteme jasaı otyryp.

«Daıyndyq jumystary júrip jatyr — ózen arnasyn tazalaý jáne túzetý boıynsha edáýir jumystar atqaryldy.  Atbasarda eki úlken kópir bar — biri temir jolǵa, ekinshisi - avtokólikke arnalǵan. Olarǵa jaqyn ornalasqan úlken aýmaq tazalandy. Ekinshiden, qubyrlardy aýystyryp jatyrmyz, 30 qarashaǵa deıin bul jumystar aıaqtalady. Onyń ústine, Atbasar bógetine jeke adamdardyń esebinen jóndeý jumystary júrgizilip jatyr, oǵan búdjetten esh qarajat jumsalǵan joq. Atbasardaǵy sharýashylyqtar tehnıkasynyń kómegimen barlyq turǵyndar bógetti qalpyna keltirip jatyr», — dedi Málik Myrzalın.

Alaıda, óńir basshysy Atbasarǵa betonnan salynǵan óndiristik bógettiń qajet ekenin basa aıtty. «Sózsiz, Atbasarǵa qaýqarly bóget qajet. Bizde ázirge topyraq úıindisi ǵana bar. Atbasarǵa óndiristik bóget turǵyzý boıynsha jumys istep jatyrmyz. Oǵan ýaqyt qajet. Jobalyq-smetalyq qujattamasyn ázirleýge oblystyq búdjetten 50 mln teńge bóldik. Saraptama ótken soń, kelesi jyly óndiristik bóget qurylysyna kirisemiz. 2018 jyly topyraq úıindisin quramyz, al 2019 jyly Atbasardy tasqyn sýdan óndiristik bóget qorǵaıtyn bolady. Turǵyndar bizge senýi qajet, al ákimdik arqany keńge salmaı, tynymsyz eńbek etýi kerek», — dedi Málik Myrzalın.

Buǵan deıin QR Úkimeti otyrysynda QR İİM basshysy Qalmuhanbet Qasymov Atbasardy qaıta sý basý qaýpi bar ekenin málimdegen edi.