Ertede bir qandyqol qaraqshy táýbe etkisi keledi. Ol Shaıqy Burqy áýlıege kelip: 
– Men qyryq jyl boıy qan tóktim. Zulymdyqtan basqa is jasamadym. Endi táýbeme keldim. Ne amal jasasam, Qudaı kúnámdi keshedi? – dep suraıdy. Shaıqy Burqy: 
– Jol shetine jemis aǵashyn ek. Ótken-ketken jolaýshylar saıasyna demalsyn. Jemisin jesin, shólin qandyrsyn, – deıdi. 
Qaraqshy joldyń jıegine kóp aǵash egip, baptaıdy. Arada birneshe jyl ótkende aǵashy jaıqalyp, baqshaǵa aınalypty. Jolaýshy demalyp, kerýen at shaldyratyn shuraıly jerge aınalady. Bir kúni Shaıqy Burqy jolaýshylap kele jatyp, qaraqshynyń baqshasyna kezigedi. 
– Bul kimniń baǵy? – dep suraıdy. 
– Baqtyń ıesi joq. Jergilikti jurt «qaraqshynyń baǵy» dep ataıdy. Qaraqshynyń ózi on jyl buryn dúnıeden ozypty, – deıdi. 
Shaıqy áýlıe baqtyń jemisin jep, sol jerde túneıdi. Túsinde baıaǵy qaraqshyny kóredi. Ol jumaqtyń baqshasynda otyr eken. Tóbesinen nur tamshylap turady. 
Shaıqy: 
– Eı, Alla, bul ne hıkaıat? Qaraqshynyń tóbesinen nur ne úshin tamshylap tur? – dep suraıdy. 
– Munyń ekken aǵashynyń saıasyna san adam kelip demalady. Jemisin jeıdi. Sonyń saýaby ózine ahırette óshpes azyqqa aınaldy, – deıdi. Shaıqy Burqy uıqydan kóńildi oıanypty. 
Sodan bastap el arasynda «aǵash ekseń, kúnáń jeńildeıdi», — dep nasıhat aıtypty. 

Aǵash ekse, adamnyń kúnási jeńildeıtini jóninde taǵy bir ańyz bar. Ertede bir jigit tús kóredi. Túsinde ákesi shól dalada kóleńke izdep júripti. Kúnniń ystyǵynan tabany kúıip, janushyra aıqaılaıdy. Jigit shoshyp oıanady. Aýyl ishinde júz jasaǵan qarıaǵa baryp túsin jorytady. Ol: 
– Balam, ákeńniń qabirine aǵash ek. Ákeń qabirde aýyrlyq tartyp jatyr. Aǵash kúnásin jeńildetedi, – dep jorıdy. 
Bala ertesine ákesiniń molasyna aǵash egedi. Ony kútip, baptap ósiripti. Bir kúni taǵy da tús kóredi. Túsinde ákesi úlken bir aǵashtyń kóleńkesinde jatyr eken. 
«Mazar basyna aǵash ekse, saýaby tirige de, ólige de tıedi», — degen sóz osy ańyzdardan úlgi bolyp jetipti. 
Dinı ańyzdarda mazarǵa aǵash otyrǵyzý Kemel degen áýlıeden qalǵan desedi. Ol ýaǵyzda: 
– Mazar kórseń, aǵash ek. 
Butaqqa bóz baıla kóp. 
Qus qonatyn baq ósip, 
«Hý, hý, hý» dep saırar ed, – dep nasıhattaıdy eken .