– Bul úıde ne shesheń tursyn, ne men turaıyn! Sharshatty ábden! 
Ótkiz anaý qarttar úıine! Sol shesheń úshin myna úıde kúnde urys. Berekemiz ketti. Shalynyń artynan nege ketpedi eken… Ótkizbeseń bala shaǵany jınaımyn da ketemin. Qalyńdar shesheń ekeýiń!!!
Arada bir aı ótti. Áıelimniń qabaǵy ashylmady. Balalardy ádeıi jylatady. Anama ádeıi sýyǵan sháı, dámsiz tamaq beredi. 
Jumysta bolatynmyn. Úlken ulym telefon soqty. «Tez jetińizshi, órtenip jatyrmyz» dep. Alyp ushyp úıge jettim. Anam ózi tamaq isteımin dep as bólmede órt shyǵyp ketipti. Jer úı bolǵan soń syrtqa shyǵyp úlgeripti. Áıelim de meniń artymsha keldi.
– Boldy jeter! Qurt shesheńdi! Bir kúni myna túrimen úıdi órteıdi. Jap jańa mebelimdi qurtypty!
Bir jaǵynan áıelimdiki de durys shyǵar. Biz úıde joq kezde jalǵyz qalady. Erteń úıdi órtep jiberse she. Odanda qarttar úıinde jaǵdaıy durys bolady.
Men osy sheshimge toqtadym. Araǵa birer kún salyp anammen sóılestim.
– Bir-eki aıǵa sizge sanatorıge pýtevka alyp keldim. Demalyp, kishkene densaýlyǵyńyzdy túzep qaıtasyz… 
– Maǵan osynda da jaqsy ǵoı balam. Ol jerde jaǵdaıym bola qoıar ma eken. Sender jumystasyńdar, myna úıge de bas-kóz bolatyn adam kerek. Bárin qoıshy, ol jaqqa ketsem kishkentaı Bakontaıymdy saǵynamyn ǵoı…
Bakontaı dep otyrǵany eń kishkentaı nemeresi. Ájesimen birge uıyqtaıdy, onsyz tamaq ishpeıdi. Ekeýi bir birine sondaı baýyr basyp qalǵan.
Ary aıtyp, beri aıtyp ol kisini aqyry kóndirdim. Anamnyń eki sómke zattaryn mashınaǵa salyp jatqanda Bakontaı ájesiniń ketip bara jatqanyn kórip qolynan tartyp «ketpeshi, ketpeshi» dep jylaǵany áli kóz aldymda. Anam da ony qımaı bet oramalymen kóz jasyn súrtýmen boldy. «Ájeń doqtyrǵa baryp kelsin qazyr. Sosyn saǵan kóóóp ertegi aıtyp beremin. Qulynym sol, kútiiip júr, men kelemin….»
Bala júrek ájesiniń endi qaıtyp kelmeıtinin sezgendeı… Mashınanyń artynan biraz jerge deıin jylap júgirdi. Iá, perishte júrek bárin de sezdi, bárin…
Anamdy atyń óshkir qarttar úıine ákelgende ǵana qaıda kelgenimizdi aıttym.
– Bakontaıym sonsha jibergisi kelmegen edi… Jaqyn adamynyń kelmeske ketip bara jatqanyn sezipti ǵoı. Bilemin balam, men úshin kelinmen kóp ursatyn bolyp kettińder. Solaı sheshseńder kónemin… Qaldyryp ket meni… Biraq bir ǵana ótinishim bar… Bakontaıdy ákelip turyńdar. Kózimniń tirisinde mańdaıynan ıiskep júreıin. Erteń ólgen soń….
Men esikten shyǵyp júre berdim. Kóligime jetkenshe júregim qatty qysyldy.
Úıge keldim. Bakontaı aldymnan júgirip shyqty. Kózinen «Ájemdi qaıda aparyp tastadyń?» degen suraqty baıqadym. Áıelime anamdy qarttar úıine ótkizgenim unady. Jany jáı taýyp kóńildi júr. Sońǵy bir aıda jemegen taǵamdardyń túr túrin istep tastady. Biraq tábetim joq. Kúrsine berem, kúrsine berem… Anamnyń orny qatty biline bastady. Bakontaı ájesin kúnde suraıdy. Bir kúni ony ájesine alyp bardym. Bizdi kóre sala Bakontaıdy qushaqtaı aldy. 
– Qulynym, jaryǵym sol. Tátti balapanym. Úlken jigit bop ketipti ózi. Qarashy ájeń saǵan kóóóp kámpıt jınap qoıdy. Má, ala ǵoı botam.
Anam jastyǵynyń astynan bir ýys kámpıtterdi alyp Bakontaıǵa berdi. Jylap tur, nemeresin kórgenine qýanǵanynan… 
Keterde Bakontaı ájesiniń qasynda qalamyn dep jylady. Ájesi jatqan kereýetten jibermeı ustap jylap tur. 
– Bakontaı, qulynym, sen úıge qaıta ber jaraı ma? Men erteń baramyn… Aqyldym meniń, úlken jigitter jylamaıdy. Qane papańmen bara ǵoı…
Úıge kelgen soń bulaı bolmaýy kerek dep oıladym. Anamdy qarttar úıine kereksiz adamdaı aparyp tastadym. Ne úshin? Áıelimniń sózine erdim, ketem degeninen qoryqtym. Men qorqaqpyn! Joq, qandaı jaǵdaı bolsa da anamdy qaıta ákelýim kerek! Osyndaı oılarmen úsh aıdan asa ýaqyt júrdim. Anamdy kórýge de bara almadym. Ózim basqaratyn fırma bankrotqa tústi, onyń arasynda jalǵa alyp istep otyrǵan dúkenimdi tonap ketti. Tek sátsizdik, tek shyǵyn. Bakontaı esik aldyndaǵy taldan qulap aıaǵyn syndyrdy. Osynyń bári az ǵana ýaqyttyń ishinde birinen keıin biri bolyp ketti. 
Bir kúni jumysta qaǵazdarmen basym qatyp otyrǵanmyn. Telefonyma belgisiz nómirden qońyraý keldi. Kóterdim….
Ómirimdegi eń sýyt qońyraý osy edi. Qarttar úıinen habarlasty. Anashym ómirden ótipti… Bala kúnimde mektepke qalaı muntazdaı etip kıindirip jibergeni, múǵalimderim balańyzdyń sabaq úlgerimi óte jaqsy dep maqtaǵanda «meniń aqyldym ǵoı» dep mańdaıymnan sıpaǵany, bir kúni ózi kóılek alamyn dep bazarǵa ketip, maǵan kóp kıimder ákelip ákeme: «mynalardy kórip balamyzǵa alǵym kelip ketti. Kóılekti basqa bir joly alarmyn» degeni, men oqýǵa túskende meni qushaqtap, qatty qýanǵany, úılený toıymda qýanyshtan tolqyp jylaǵany, bári bári kóz aldymnan lenta bolyp ótip jatty… Úıge kelip áskerde júrgende amandyǵymdy tilep jazǵan eski hattaryn, Anashymnyń qoltańbasy qalǵan saǵynyshqa toly sarǵaıǵan hattardy qushaqtap ókirip jyladym….
Ókinish tirideı órtedi. Endi kesh, men tym kesh qaldym. Tipti júreginiń sońǵy soǵysyn da estip úlgermedim… 
BAQUL BOL ENDİ, ANASHYM…!!!