Kóneniń áńgimesin jınap júrip byltyr Qarmaqshyda Nyǵmetolla degen qarıaǵa jolyqtym. Jasy 86-dan asqan eken. Ómirden kórgeni, túıgeni kóp. Biraz suhbattastyq. Sóz arasynda «90 moldany qashyrǵan» atty áńgimeni aıtyp berdi. Uzyn yrǵasy bylaı:

— HH ǵasyrdyń basynda Syr boıynda kete atalyǵynda Bekmyrza degen bolys ómir súripti. Onyń uly Tuńǵyshbaı da ákesiniń jolyn qýyp, 25 jasynda bolystyq qyzmetke keledi. Taǵdyrdyń jazýy kóp uzamaı balasy dúnıe salady. Jerlep, sharıǵat boıynsha bar mindetin oryndaıdy. Keıin Bekmyrza balasyna as beretin bolady. Múmkin, bolystyń baılyǵynan dámetken de bolar, sol óńirden duǵa oqymaq nıetpen 90 molda jınalypty. Ol kezde duǵa oqyp, bata jasaǵan moldalarǵa bir-bir mal jetektetedi eken. «Osynsha moldaǵa qalaı mal taýyp beremiz», — dep áýlet úlkenderiniń únjurǵasy túsip ketipti. Muny Bekmyrzanyń áıeli baıqap qalady. Anamyz ózi aqyldy, taýyp aıtatyn jáne dál aıtatyn, tekti kisi eken.

– Aý, aǵalar, nege tunjyrap otyrsyzdar? – depti.

– Myna jınalǵan toqsan moldany ne qylamyz? – deıdi.

– Onyń ne oılanatyny bar. Moldalar Bolatbaıdyń qasyna barsyn da daýystap kezek-kezek quran oqysyn. Oqı almaǵany sadaqadan aýyz tıip qaıta bersin, – depti.

Bolatbaı Aldashbaı ahýnnan alǵash bilim alǵan shákirtterdiń biri eken. Jaryqtyq, sharıǵı bilimdi, dinı saýatty kisi eken. Jınalǵan 90 moldanyń 10 ǵana Bolatbaıdyń janynda quran oqýǵa dáti jetipti. Qalǵandary shala saýattylyǵynan uıalyp, qaıyrly bolsyn aıtyp, astan dám aýyz tıip kete beripti. Tipti, keıbiri qashqandaı bolyp áreń qutylypty. Keıin osy áńgime el aýzynda «90 molda qashqan» degen atpen taralyp ketipti...

Ne degen tapqyrlyq, deseıshi-áı?! Búginde sharıǵatty aıtyp, qataıyp júrgen keıbir baýyrlarymyzdy osylaı bir synatyp alar ma edi? Ótkende bir aǵam aıtyp edi. Aqylgóısip, qataıyp júrgen bir jigit suraq qoıyp basty qatyrǵanda «attahıat» duǵasyn oqyp bershi dese, durys jattamapty ári qate oqypty. Oılap otyrsaq, ataqqa bar, amalǵa joq azamattar qaı kezde de bolypty ǵoı.

Ularbek Nurǵalymuly