Oral qalasynyń azamattyq ister boıynsha №2 sotynda qala turǵyny Áset Sultannyń №7 orta mektep basshylyǵyna qarsy shaǵymy boıynsha negizgi sot prosesine aldyn ala tyńdaý ótti. Mektep dırektory Vıktor Protasov mekteptiń ishki jarǵysy men bilim jáne ǵylym mınıstriniń "túrli konfesıalardyń dinı elementteri bar kıimmen mektepke kirgizbeý týraly" buıryǵyna silteme jasap, birinshi synyp oqýshysyn sabaqqa kirgizbeı otyr, dep Qamshy.kz aqparat agenttigi Azattyqqa súıene otyryp jazady.

Vıktor Protasov sotta ózderiniń talaptary "mektep jarǵysy men ishki tártipke tolyq saı keletinin" habarlady. Ol buǵan qatysty Azattyqqa komentarı berýden bas tartty.

Áset Sultan bul shekteýdi zańsyz dep, sottan qyzyn sabaqqa kirgizýdi suraıdy. Onyń sózine qaraǵanda, qyzy mektep formasyna qosa qazaqtyń ulttyq bas kıimi - kımeshek kıedi.

Shaǵymdanýshynyń advokaty Arman Ábdirashıt ishki jarǵy pýnkteri men mınıstrdiń jarǵysy Qazaqstan Konstıtýsıasynyń "memlekettik mekemede tegin orta bilim alýǵa kepildik beretin" jáne "orta bilim alýǵa mindetteıtin" 30-babyna qaıshy keletinin aıtady.

Sotta advokat pen shaǵymdanýshy sot prosesi júrip jatqan kezde oqýshyny sabaqqa jiberýdi surap talap-tilek bildirdi. Sýdıa Gúlnár Musaýrova ol talap-tilekti qabyldamaı tastady. Sotqa úshinshi tarap retinde qalalyq bilim bóliminiń ókilderi de shaqyrtylǵan. Biraq olar sotqa kelmedi.

Bul shaǵym boıynsha negizgi sot prosesi 23 qarashaǵa belgilendi.

Bul sotta 15 qarashaǵa taǵy úsh oqýshy ata-anasynyń qaladaǵy №37 orta mektepke qarsy shaǵymy boıynsha aldyn ala tyńdaý belgilengen. Mektep basshylyǵy ol úsh oqýshyny da qazannyń ortasynan beri sabaqqa kirgizbeı otyr.