Astanadaǵy Ortalyq komýnıkasıalar qyzmetiniń brıfıńinde Almaty oblysynyń ákimi osy jaǵymdy jańalyqty jetkizdi. Amandyq Batalov Jetisý jerinde halyq sany 2 mıllıonnan asqanyn aıtyp, bıyl atqarylǵan jumystar týraly baıandady, dep jazady Qamshy.kz.
Oblys ákimi brıfıńte ózi basqaryp otyrǵan óńirdiń saıası-áleýmettik, mádenı, ınfraqurylymdyq damýy týraly baıandady. Qazirgi ýaqytta oblysta 16 aýdan men 3 qala ákimdigi bar. Óńir basshysy óz baıandamasynda oblystyń áleýmettik-ekonomıkalyq damýy, memlekettik baǵdarlamalardyń oryndalýy jáne «EKSPO-2017» halyqaralyq mamandandyrylǵan kórmesiniń qorytyndysynda qolǵa alynǵan jobalar týraly keńinen áńgimeledi.
Bıyl 9 aıda Almaty oblysynda 540 mlrd teńgeniń ónimi óndirildi. Barlyq sala boıynsha damý qarqyny jaman emes. Jyl sońyna deıin ındýstrıalandyrý kartasy aıasynda 7 ınvestısıalyq jobany iske qosý josparlanyp otyr. Bastysy, bul kásiporyndar 1,5 myń jumys ornyn qurýǵa septigin tıgizbek. Budan bólek bıyl 611 myń sharshy metr turǵyn úı paıdalanýǵa beriledi. Amandyq Batalovtyń sózine qaraǵanda, aımaqta sheshimin tappaǵan másele joq.
Óz sózinde oblysy ákimi "Biz 2-3 jyl ishinde 2,9 mlrd teńge qostyq. Áýejaı saldyq. Joldar myna kósheden kem emes. Úkimetke, QTJ-ǵa shyǵyp, qazir temirjol vokzalyn salyp jatyrmyz, sý qubyryn salyp berdik. Ótken jyly aýrýhana salyp berdik. Qazir barsańyz, tań qalasyz", - dedi oblystyń damýy jaıynda.
Aýyl sharýashylyǵynyń ónim kórsetkishi boıynsha da Almaty oblysy kósh bastap tur. Azyq-túlik baǵasyn retteý kerek ekenin alǵa tartqan oblys basshysy óńirde bólshek saýda ortalyǵy ashylatynyn aıtty. Sonda ónimder deldalsyz birden dúken sórelerine jetkiziledi. Jobany ırandyq kompanıa iske asyrmaq. Investısıany da solar quıady. Tek jer telimin bersek bolǵany. Eger jospar júzege assa, ortalyq keler jyly iske qosylady. Sondaı-aq óńir basshysy qant qyzylshasyn da sóz etti. Bıyl 35 myń tonna qant alý josparlanyp otyr. Biraq elimizdiń bul ónimge degen jyldyq suranysy 500 myń tonnaǵa deıin jetedi. Alaıda aımaq onyń tek 20%-yn ǵana qamtamasyz ete alady. Sóz sońynda Amandyq Batalov úzdik ákimderdiń reıtıńinde únemi aldyńǵy qatardan kórinse de, oǵan qyzyqpaıtynyn aıtty.
Oǵan qosa, Almaty oblysyndaǵy ındýstrıaldy aımaqtarda 17 kásiporyn jumys istese, aldaǵy ýaqytta onyń sanyn 400-ge jetkizýge múmkindik bar.
– Seriktes qala «GateCity»aýmaǵynda «Berek» jańa ındýstrıaldy aımaǵy qurylyp, onda iri kompanıalardyń qatysýymen jalpy somasy 90 mlrd. teńgelik, 2 myń jumys orny qurylatyn 5 iri ınvestısıalyq joba júzege asyryla bastady. Olardyń qatarynda et polýfabrıkattaryn shyǵaratyn «Baýmann» (Germanıa), kartop óńdeıtin «Farmfrıts» (Golandıa), jylyjaı sharýashylyǵy boıynsha «Ekokýltýr» (Reseı) kompanıalary bar, – dedi Amandyq Batalov.
Sondaı-aq oblysta «Taldyqorǵan», «Bereke», «Arna», «Boraldaı», «Qazybek bek», «Qaırat» – 6 ındýstrıaldy aımaq bar ekeni jáne olardyń barlyq qajetti ınfraqurylymmen qamtamasyz etilgeni aıtyldy.
Brıfıń barysynda jýrnalıser jalpy sany 20-ǵa jýyq saýal qoıdy. Suraqtar negizinen týrızmdi, onyń ishinde Alakól jaǵalaýyn damytý, et eksportyn arttyrý, qant pen kókónis baǵasyn turaqtandyrý sharalary, gazdandyrý barysynda áleýmettik áljýaz toptarǵa jeńildikter qarastyrý, balabaqsha qurylysy, úsh aýysymdy mektepterdiń máselesin sheshý jáne taǵy basqa da máseleler týraly boldy. Suraqtardyń barlyǵyna tolyqqandy jaýap berildi.
