2017 jyldyń 15 qarashasynda Bolat Ótemuratovtyń Qory jáne «Qazaqstan Respýblıkasy Qyzyl jarty aı qoǵamy» QB arasynda tótenshe oqıǵalar kezinde zardap shekken Qazaqstan turǵyndaryna kómek kórsetý aıasynda yntymaqtasý jóninde memorandýmǵa qol qoıylady,- dep jazady Qamshy.kz aqparat agenttigi. 

Kómek qarjy ForteBank kómek kartalaryna aýdarylyp, keıin ony Qyzyl Jarty aı qyzmetkerleri tótenshe oqıǵalar oryn alǵan kezde zardap shekkenderge bólip beredi. Kómek somasy 67 200 000 teńgeni quraıdy.  33 600 000 mólsherindegi alǵashqy transh 2017 jyly, al ekinshi transh 2018 jyly aýdarylady.

Bir kartaǵa aýdarylatyn soma 20 000 teńgeden bastap 30 000 myń teńgege deıingi aralyqta bolady dep josparlanyp otyr. Bul qarjyǵa tamaq, jeke gıgıena zattaryn jáne tabıǵı apattyń alǵashqy kúnderi eń qajetti zattardyń barlyǵyn satyp alýǵa bolady. Atalmysh kómek memleket tarapynan qabyldanatyn sharalarmen qatar zardap shekkenderge kórsetiletin birinshi materıaldyq qoldaý retinde kórsetiletin bolady.

Bolat Ótemuratov qaıyrymdylyq qorynyń negizin salýshy osyǵan oraı bylaı dep atap ótti: «Tabıǵı  apat saldarynan adamdar baspanasyz qalyp, as-sýdan aıyrylǵan kezde men buǵan beı-jaı qarap tura almaımyn. Qordyń, ForteBank-tyń jáne Qyzyl Jarty aı qoǵamynyń birlese kúsh jumyldyrýy arqasynda biz zardap shekkenderge alǵashqy gýmanıtarlyq kómekti kórsetetin bolamyz. Osy kóp tarapty bastamamyzdy bıznes ókilderi jáne qoǵamdyq uıymdar qoldaıdy dep úmittenemiz».

Serik Áýbákirov, Almaty qalasy Tótenshe oqıǵalar departamentiniń bastyǵy: "Tótenshe oqıǵalarǵa daıyndalý jáne áreket etý memlekettik qurylymdardyń ǵana emes, sonymen birge, árbir Qazaqstan azamatynyń isi bolýy tıis. Bul qyzmette ártúrli uıymdar arasyndaǵy seriktestik erekshe mańyzǵa ıe".

Qazaqstan Qyzyl jarty aı qoǵamynyń bas dırektory Elena Kım: «Bizdiń uıym apatty jaǵdaılar kezinde áreket etý jáne zardap shekkenderge kómek kórsetý boıynsha kóp jyldyq tájirıbe jınaqtaǵan. Biz halyqaralyq tájirıbeni qoldana otyryp, óz tetikterimizdi udaıy jetildirip otyramyz. Atalmysh seriktestik aıasynda daıyndalǵan mundaı júıeniń arqasynda biz turǵyndarǵa barynsha jyldam ári tıimdi túrde kómek kórsete alatyn bolamyz. Al tótenshe jaǵdaılar kezindegi eń mańyzdysy osy ýaqyt pen tıimdilik ekeni sózsiz. Bıznestiń, azamattardyń jáne beıkomersıalyq sektordyń kúsh jumyldyrýy nátıjesinde osyndaı ómirlik mańyzǵa ıe jobalar paıda bolyp otyrǵanyna biz asa qýanyshtymyz».

«ForteBank» AQ basqarma tóraǵasy Maǵjan Áýezov: «Osy jobaǵa qatysyp otyrǵanymyz biz úshin úlken mártebe ári zor jaýapkershilik. Tabıǵı apat saldarynan týyndaǵan tótenshe oqıǵalar kezinde zardap shekkenderge shapshań ári jedel túrde kómek kórsetý asa mańyzdy. Qabyldanatyn sheshimder tehnologıalyq jaǵynan joǵary, naqty, senimdi ári aıqyn bolýy tıis. Búgin qol qoıylǵan memorandýmnyń kózdegeni dál osy maqsat».

«Ótken jyldardaǵy tájirıbeden túıgenimiz, qazaqstandyqtar zardap shekkenderge kómek kórsetýde aldyna jan salmaıdy, - dep atap ótti Bolat Ótemuratov qorynyń dırektory Marat Aıtmaǵambetov.  – Eriktilerdiń azyq-túlikter men zattardy jınap, iriktep, júk kólikterin kıim-keshek pen azyq-túliktermen lyq toltyryp tıep jatqanyn kórdik. Bul bizdiń azamattardy tek jaqsy jaǵynan ǵana kórsetedi. Sol sebepti de biz apatty jaǵdaıda zardap shekkendermen tikeleı baılanysa otyryp jumys júrgizetin uıymdarǵa járdem  jasaý, osy kómekti utymdy ári shapshań túrde kórsetý jóninde sheshim qabyldadyq».