Búgin Parıjde uıym basshylyǵynyń qatysýymen Halyqaralyq kórmeler búrosy (HKB) Bas assambleıasynyń 162-sessıasy ótti. Jıynda «Astana EKSPO-2017» UK» AQ Basqarma Tóraǵasy Ahmetjan Esimov Astana qalasyndaǵy EKSPO-2017 Halyqaralyq mamandandyrylǵan kórmesin ótkizý qorytyndylary týraly sóz sóıledi,- dep Qamshy.kz aqparat agenttigi. 

HKB Assambleıasynyń sesıasy barysynda Ahmetjan Esimov QR Prezıdenti Nursultan Nazarbaevtyń atynan HKB Bas hatshysy Vıssente Lossertaleske İİ dárejeli «Dostyq» ordenin tabystady. Ulttyq kompanıanyń basshysy álemde EKSPO kórmeleriniń jemisti ótkizilýinde HKB róli erekshe ekendigin atap ótti.

«Bizdiń aldymyzda úsh basty mindet turdy: 100 astam el men jeti halyqaralyq uıymnyń qatysýyn qamtamasyz etý, eki mıllıonnan astam kelýshilerdi tartý men sharany joǵary deńgeıde uıymdastyrý. Barshańyzǵa belgili, EKSPO kórmesine 115 el men 22 uıym qatysty», - dedi Ahmetjan Esimov. 

Sonymen qatar, kelýshiler sany josparlanǵan kórsetkishten eki ese asty, Kórmeni tórt mıllıonǵa jýyq adam tamashalady. Máselen, Qazaqstannyń ulttyq pavılony - «Nur Álem» nysanyna bir mıllıon úsh júz myń adam kelgen.

«Búginde aldymyzda turǵan maqsattardyń barlyǵyna qol jetkizip, mindetterdi oryndaǵanymyzdy zor maqtanyshpen aıta alamyz. Jumyla jumys istep, joǵary tehnologıaly aımaq qurdyq», - dep atap ótti Ulttyq kompanıanyń basshysy. 

EKSPO Qazaqstannyń ekonomıkalyq damýyna serpin berdi. Kórmege daıyndyq jumystary jáne ony ótkizý barysy JİÓ-niń 4,3%-ǵa ósýine septigin tıgizdi. Sondaı-aq, taýar shyǵarylymynyń ósimi 70%-ǵa, al týrısik qyzmetterge degen suranys 78%-ǵa ulǵaıdy.

EKSPO-2017 bastalýyna deıin, biregeı obektilerdi kórme murasy retinde saqtaý jáne yńǵaıly týrısik aımaqty qurý sheshimi qabyldandy.  

Esterińizge salaıyq, 11 qarashadan bastap «Nur Álem» ulttyq pavılony, Úzdik tájirıbeler aımaǵy, eki taqyryptyq pavılon jáne Art-ortalyǵy  qaıtadan óz esikterin aıqara ashty.