Qazaqstan Prezıdenti Nursultan Nazarbaev qańtarda AQSH Prezıdenti Donald Tramppen kezdesedi, dep habarlaıdy Qamshy.kz aqparat agenttigi QazAqparat málimetine súıenip.
«Jýyrda telefonmen suhbat kezinde Prezıdent Tramp meni Aq úıge shaqyrdy. 2018 jylǵy 1 qańtardan bastap Qazaqstan BUU Qaýipsizdik Keńesine tóraǵalyq etýine baılanysty men sonda bolamyn. Sol kezde men Vashıngtonǵa baratyn bolyp kelistik», - dedi Nursultan Nazarbaev elordada 13 qarashada ótken Astana klýbynyń úshinshi otyrysynda.
Memleket basshysy, eki eldiń ekonomıkalyq baılanysta ekenin aıtyp ótti.
«300-den astam amerıkalyq kompanıalar Qazaqstanda jumys isteıdi. Atalmysh kompanıalar bizdiń elimizge 50 mlrd dollar ınvestısıa quıyp otyr. Olar iri kólemdegi munaı, energetıka kompanıalary. Biz tehnologıa salasynda da seriktestigimiz jalǵasqanyn qalaımyz» dep atap ótti Elbasy óz sózinde.
