Ónerli otbasyn qoldaý baǵytynda QR Mádenıet jáne sport mınıstriniń kórkemónerpazdar ujymdaryna Halyqtyq (úlgili) ataqtaryn berý týraly buıryǵy shyqqan bolatyn. Osy buıryqqa sáıkes Batys Qazaqstan oblysynyń 32 kórkemónerpazdar ujymy «Halyqtyq» ataǵyn alǵan bolatyn. Solardyń biri jáne biregeı oraldyq Bıǵalıevtar otbasylyq ansambli edi.
Atalmysh otbasy ótken jyly «Mereıli otbasy - 2016» baıqaýynda oblystap top jaryp, ónerimen,ónegesimen birinshi oryn alǵan edi. «Ansámbldi osydan otyz jyldaı ýaqyt buryn ákem Marat Qalıuly uıymdastyrǵan bolatyn,-deıdi atalmysh óner uıymynyń ánshisi Arman Bıǵalıev. Armannyń ákesi Marat pen zaıyby Nurjamal da óneri adamdary. Marat aǵa Qaztalov aýdanynyń Qoshankól aýylynda týyp, sonda eńbek jolyn bastap, úsh ul, úsh qyz tárbıelegen jan. Otbasylyq ansámbldiń qurylǵanyna bıyl otyz jyldan asqan. Ul-qyzdary negizinen ár túrli salada qyzmet etse de, ata-anasy baýlyǵan óner jolynan alys ketpedi. Ansámbl elimizdiń qalalarynda ǵana emes, Reseıdegi Saratov oblysynyń Novoýzensk, Engels aýdandarynda jeke konsertterin jıi ótkizip turady.
Bıǵalıevter otbasy ár kún saıyn bas qosyp, aldaǵy baıqaýǵa daıyndyqtaryn pysyqtaıdy eken. Óz óńirinde 26 otbasynyń arasynan úzdik shyqqan bolatyn.
- Birinshi oryn alý bul jeńildikpen kelgen joq. Biz 30 jyl boıy januıalyq ansámbl quryp, sodan beri qaraı mine eńbekpen sahna tórinde januıamyzben án shyrqap kelemiz. «Otan – otbasynan bastalady deıdi. Qandaı úlken bolsyn, ol shaǵyn memleket – otbasynan bastalady. Shaǵyn memlekettiń irgetasy myqty bolsa, bizdiń elimizdiń de irgetasy myqty bolady. Shańyraqtyń ýyǵy, keregesi myqty bolsa kez kelgen qıyndyqty jeńip shyǵady, -deıdi otaǵasy Marat Bıǵalıev.
Al uly Arman Bıǵalıev te shańyraqtaǵy óner de, úlgi-ónege de ana sútimen, ata tárbıesimen daryǵandyǵyn aıtady.
-Ol kezde ákem, anam, úsheýmiz boldyq. Sońynan eki inim men úsh qaryndasym qosyldy. Búginde balalarymyz tartylyp, qazirgi ýaqytta ansámbldiń quramynda on bes shaqty jan óner kórsetýde. Biz qurylǵannan bastap túrli mádenı sharalarǵa qatysyp, óz aýylymyzǵa, kórshi aýyldarǵa, aýdan ortalyǵyna, tipti Reseıdegi qandastarymyz qonystan aýyl-aımaqtarǵa baryp tegin konsertter qoıdyq. Sóıtip el táýelsizdiginiń eleń-alań shaǵyndaǵy qıyndyq kezde halyqtyń rýhyn ónermen kóterýge atsalystyq,- deıdi keıipkerimiz.
Ótken jyly olar Qoshankóldegi «Birligi jarasqan otbasy» dep tanyldy. Endi bul baǵyttaǵy aýdandyq, oblystyq saıystarǵa qatysyp turady. Ónegeli januıa músheleri bir-birin demep, boıyndaǵy talantyn, qarym-qabiletin ushtap, yntymaq, tatýlyqpen zor jetistikterge jetýi – tynymsyz eńbektiń arqasy. Mundaı ónerli otbasy – el yrysy, qoǵamǵa úlgi. Bıǵalıevter áýletinde otaǵasy Marat otbasynyń asqar taý tiregi bolsa, otanasy Nurjamal – januıa shýaǵy, «Kúmis alqa» ıegeri.
Bıǵalıevtar otbasylyq ansambliniń repertýarynda halyqtyq jáne túrli ult ókilderiniń ánderi mol. Sondaı-aq jergilikti sazgerlerdiń de shyǵarmalaryn oryndaıdy. Olardyń arasynda osy ansámbldiń múshesi, jas sazger Aınur Bıǵalıeva jazǵan ánder de bar. Aıta keteıik, Aınur Maratqyzy osydan úsh-tórt jyl buryn «Meniń armanymdaǵy qala» atty oblystyq jas sazgerler baıqaýynda 1-oryn alǵan bolatyn. Negizinen ol týǵan jerge arnalǵan shyǵarmalarǵa ánder jazady.
Halyqtyq ataǵyn alyp, qanattanǵan Bıǵalıevter otbasylyq ansambli aldaǵy ýaqytta da jerlesterin ónerlerimen sýsyndatyp, aýyl mádenıetin kórkeıtýge óz úlesterin qosa bermekshi.
Gúlim AQAP,
Batys Qazaqstan oblysy
