Jýyrda Oral qalasyndaǵy Dostyq úıinde «Qazirgi qoǵamdaǵy otbasy jáne otbasy qundylyqtarynyń mańyzy» taqyrybynda dóńgelek ústel uıymdastyryldy.

 Sońǵy jyldary erli-zaıyptylardyń ajyrasyp, otbasylardyń buzylýy jıileı tústi. Osyǵan oraı shara barysynda qyz balanyń tárbıesi, er adamnyń mindetteri, otbasy músheleriniń róli sekildi taqyryptar aıasynda baıandamalar oqyldy.

– Búgingi sharanyń mazmuny erekshe. Otbasy - qoǵamnyń baılyǵy.  Qazaqsta «Úılený – ońaı, úı bolý - qıyn» degen mátel bar. Úlgili otbasy – jarasymdy juptan shyǵady. Otbasyndaǵy ata-ananyń bir-birin túsinispeı  ajyrasýynan kóbine perzentteri moraldyq zardap shegedi. Osy oraıda búgingi sharanyń mańyzdylyǵy zor. Bul basqosýǵa  tolyq emes otbasylar, jalǵyzbasty analar sekildi arnaıy top músheleri jáne olarmen tikeleı baılanysta qyzmet isteıtin ıývenaldi polısıa ınspektorlary, prokýratýra qyzmetkerleri, psıhologtar qatysyp otyr. Barshamyz birigip otbasy jaǵdaıyndaǵy ózekti máselelerdi kóterip, olardyń sheshimin taýyp, aldyn alýǵa tyrysamyz. Árbir sharaǵa qatysýshy otbasy qundylyqtary jóninde oı túıedi dep senemin, - deıdi «Aq otaý» otbasy ortalyǵynyń tóraǵasy Altynaı Esqalıeva.

Qoǵamdaǵy turmysy tómen otbasylarda tárbıelenip jatqan jetkinshekterdiń jaǵdaıy erekshe alańdatady. Polısıa qyzmetkerleriniń málimdeýinshe  jaǵdaıy nashar 74 januıa tirkeýde tur. Al 118 bala atalǵan otbasylarda tárbıelenýde eken. İshimdikke úıir bolyp, esh jerde jumys jasamaıtyn ata-analardyń máseleleri arnaıy komısıalarǵa usynylyp, ákimshilik jaýapkershilikterge tartylýda. Quzyrly organdar olardyń qyzmetke ornalasýyna járdemdeskenimen, oń nátıje bermeı otyrǵanyn aıtady mamandar.

– Sonymen qosa mas kúıinde anasy balasyn uryp-soqqan jaǵdaılar da kezdesken bolatyn. Ata-anasynan qoryqqan balanyń úıinen qashyp ketý faktisi tirkeldi. Osyǵan oraı QR Qylmystyq kodeksiniń 142-baby, 2-tarmaǵy boıynsha is qozǵalyp otyr, - deıdi Oral QİİB ıývenaldyq polısıa bóliminiń aǵa ınspektory Aqmaral Jaılyǵulova.

Gúlim AQAP,

Batys Qazaqstan oblysy