Jastar mádenıet úıinde «Aq otaý» otbasy ortalyǵy» qoǵamdyq birlestiginiń uıymdastyrýymen «Baqytty otbasy» merekelik sharasy ótti.
Merekelik sharaǵa qalalyq máslıhat depýtaty., J. Dosmuhamedov atyndaǵy pedaggıkalyq kolejdiń dırektory  Shalqyma Qurmanalına qatysyp, otbasy qundylyǵy – memleketimizdiń turaqty damýynyń kepili ekenin atap ótti.

-Ata-ana - tárbıe  ónegesi, sondyqtan «Ata kórgen-oq jonar, ana kórgen -ton pisher» dep  qazaq maqaly tegin aıtylmaǵan. Otbasynyń basty qazyǵy, altyn dińgegi - bala. Balanyń tárbıeli jan-jaqty bolyp ósýine berekeli, ónegeli, yntymaqty otbasynyń yqpaly mol. Qoǵamymyz úshin asa mańyzdy másele -  otbasylyq qundylyqtardyń saqtalýy men damýy, otbasy abyroıynyń arttyrý, sapaly urpaq ósirý, otbasylyq mádenıetti damytý. Osy oraıda  ótip otyrǵan shara bolashaq urpaq úshin mańyzdy,- dedi Shalqyma Haırollaqyzy.

 Shara barysynda kúmis, altyn toı ıeleri men jańa shańyraq kótergen jas otbasyǵa qurmet kórsetilip, oblys  basshysy Altaı Seıdirulynyń atynan quttyqtaý hat tabys etildi.
– Bas qosqanymyzǵa bıyl 51 jyl toldy. Búginde máýeli báıterekteı tamyr jaıyp, ul-qyzymyzdan taraǵan nemere-shóberelerimizdiń qyzyǵyn kórip otyrmyz. Jarty ǵasyr birge, tatý-tátti ómir súrip jatqanymyzdyń esh syry joq. Bastysy, ár shańyraqta birlik, tózimdilik pen syılastyq saltanat qurýy qajet. Ata-babamyzdan qalǵan salt-dástúrdi umytpaı, úlkendi syılap, kishige izet kórsetip, ulaǵatty urpaq tárbıelese, eń úlgili otbasy, mine, sol bolmaq. Barsha qaýymdy osynaý tamasha merekemen quttyqtaımyz! – dedi altyn toı ıeleri Mereke jáne Dámen Ahmetovter.
Dál merekelik shara kúni shańyraq kótergen jas jubaılar – Nurbol men Áıgerim de bul merekeni qoldaıtynyn, baqytty otbasy – el birligi men tatýlyǵynyń negizi ekenin aıtty. – Uzaq jyl shańyraǵynyń otyn óshirmeı, ota-syp kele jatqan aǵa býyn ókilderine qarap, boı túzeımiz. Altyn toı ıeleriniń búgingi qýanyshy bizge de juǵysty bolsyn. «Balaly úı – bazar» degen. Kópbalaly januıa atanyp, elimizdiń demografıalyq ahýalyna úlesimizdi qosamyz dep senemin. Otaý tikken kúnimizde osyndaı qurmetke ıe bolýymyzdyń ózin jaqsylyqqa balap otyrmyz, – dedi qalyńdyq Áıgerim.
Sondaı-aq  sharada 190 jyldyq otbasylyq dárigerlik ótili bar Álibaevtar áýleti men uzaq jyl pedagogtyq qyzmet atqarǵan Podolnyılar januıalaryna qurmet kórsetilip, kesh sońy merekelik konsertke ulasty.

Gúlim AQAP,

Batys Qazaqstan oblysy