Almaty qalasy Respýblıka saraıynda «Alashuly» tobynyń halyqqa rýhanı azyq pen rýh, jiger syılaǵan «Bizben birge» atty jeke konserti ótti dep jazady Qamshy.kz aqparat agenttigi. Atalǵan keshte «ulylar» óz ónerin kórsetip, halyqqa sózben aıtyp jetkize almaıtyn rýhty syılap, kórermenderdiń delebesin qozdyrdy. Qazaqtyń atyn halyqaralyq deńgeıge tanytyp júrgen «Ulytaý» toby, Uly dalanyń balasy Tóreǵalı Tóráli jáne etno-falklorlyq «Turan» tobymen Alashuly qosylyp óner kórsetken kezdegi kórermenderdiń ystyq yqylasyn, sezimin jetkizý tipti múmkin emes. Alashulymen birge qosylyp án shyrqaǵan kórermen 3 saǵatqa sozylǵan konserttiń qalaı aıaqtalǵanyn da baıqamaı qaldy. Sonymen birge osydan biraz ýaqyt buryn jeke shyǵarmashylyǵyn shyńdaý úshin toptan ketken Ushqyn Jamalbek pen jańa quramdaǵy Alashuly toby qazaq óneriniń qara shańyraǵynda «Qara shańyraq» ánin birge shyrqady. Kóremenderge birneshe saǵattyq emes, birneshe aılyq energıa syılaı bilgen uly qazaqtyń uldary jankúıerimen qımaı qoshtasty. Jankúıerler de konsertten birden kete qoımady. Dál osyndaı rýhty keshti ańsap, saǵynyp júrgen kórermen konsert sońynda Alashtyń uldaryn qımaı, taǵy da án surady. Naǵyz óner, naǵyz án, naǵyz ánshiler dál osyndaı bolmaq.
Halyqtyń jandy daýystaǵy konsert pen qazaqtyń kúmbirlegen qara dombyrasyn saǵynyp, ańsaǵandary baıqalyp turdy. Qazirgi XXI ǵasyrda jasandy men tabıǵı, esti men eser ándi ajyrata almaı jatqan kezde «Alash», — dep, «Qazaq», — dep urandatqan, qazaq úshin aıanbaı eńbek etip júrgen ónerlilerge biz qatty zárýmiz. Ulttyq ıdeologıa týraly tek aıtyp qana qoımaı, kórsete de bilý kerek. Keıingi býyndy osyndaı keshterge jıi aparatyn bolsaq bolashaq urpaqtyń da júregi qazaq dep soǵyp, Alash dep urandatar edi. Konsertte kishkentaı balalardyń Alash dep aıtqanyn kórgende bolashaǵymyzdyń jarqyn bolatynyna senip, úmitimiz ulǵaıa túsken. Kezindegi Álıhandar men Ahmetter Alash dep urandatar kúndi ańsap, armandap ketti emes pe? Biz – osyndaı keshtiń kýási bolǵandar men rýhty keshti ótkizgender baqytty qazaqpyz. Tek osy baqytymyzdy, baǵymyzdy qadirlep, baǵalaı bilsek bolǵany. Sheteldiń usaq-túıek, qoqysyna qyzyǵyp, eliktemeı, ózimizdiń qundy baılyǵymyzdy dáriptep, qoldasaq qana baılyǵymyzdy eselep kóbeıte alamyz.
Rýhanı azyq pen rýhty sezindire bilgen Alashtyń nar uldary jas bolsa da óz zamandastarynyń aldy ekenin kórsetip qana qoımaı dáleldeı bildi. Kórermenderdiń keshten alǵan áseri men sezimin sózben jetkizý tipten múmkin emes. Tek osyndaı keshtiń kýágeri bolyp qana rýhty, energıany sezinip, bile alasyz.
Ásel Bolatqyzy
