27 jeltoqsanda Aqtaýda UOS ardagerlerin qoldaý aksıasynyń aıasynda Prezıdent atynan 20 ardagerdi quttyqtady. Mańǵystaý oblysynyń ákimi Alık Aıdarbaev Memleket basshysynyń atynan 4 ardagerge syılyq tabystap, jeke quttyqtady dep habarlaıdy "QazAqparat". Ákim eń birinshi 90 jastaǵy Anna Grıgorevna Morozovanyń úıine bardy. Ol soǵysqa 1942 jyly 14 sáýirde shaqyrylǵan. «Biz, barlaýshylar aspan men jerdi kúzettik. Bizge tank, ushaqtardy ótkizbeý mindeti júktelgen. Áskerı nysandardyń qaýipsizdigine jaýap berdik. Shuńqyrda kóp jatatynbyz, qozǵalǵan tankiler men ushaqtardyń dybysy jer astynan jaqsy estiletin. 1942 jyly Sarapovty qorǵaı otyryp, Volga arqyly temir jol kópiriniń qorǵanysyna jaýap berdik. Kópir asty-ústine bombalaǵanyna qaramastan, bútin qaldy. Ony joǵarǵy kúsh saqtap qalǵan dersiń. Kórshi zenıttik batareıadan tek tereń shuńqyr qaldy, al bizdiń dıvızıon aman qaldy...» - dep baıandady óńir basshysyna aýyr kúnderdi  esine alǵan ardager. Anna Grıgorevna Ýkraına men Rýmynıany azat etip, Sekeshfehervar qalasyna deıin jetti. Sol jerde kópten kútken jeńisti qarsy aldy. Sońǵy 15 jylda ol İİM júıesinde qyzmet etti, kásiporyndarda túrli laýazymdar atqardy. 1960 jyly Mańǵyshlaqqa kelip, qazir osy jerdiń turǵyny. Búgin Anna Grıgorevna bala-shaǵasynyń ortasynda ǵumyr keshýde. Jaýyngerlik, eńbek,  mereıtoılyq medaldaryn qosqanda - 21 nagradasy bar. Ákimge ardager komandır atýǵa buıryq bermekshi bolǵanda, amerıkalyq «Boston» ushaqtaryn dybysy boıynsha tanyp qoıǵandyqtan, oǵan dıvızıon komandıri Malyshev óz nagradasyn sheship taqqany jaıly áńgimelep berdi.  Oblys ákimi A. Aıdarbaev bir qushaq gúl, azyq-túlikter men kókónister toltyrylǵan sebet syıǵa tartyp, Prezıdenttiń quttyqtaý hatyn oqyp berdi. «Qurmetti UOS ardageri!  Uly jeńistiń 70 jyl mereıtoıy atalyp ótiletin, aldaǵy jańa 2015 jyl merekesimen shyn júrekten quttyqtamyn! Sizder soǵys jyldary da, soǵystan keıin de qajymas, qaıratty jigerlerińizben, eńbek jolyndaǵy erlikterińizben beıbitshilikke jetý úshin, baqytty urpaq keleshegi úshin aıanbaı ter tóktińizder. Endi búginde keıingi urpaqtyń qurmetine bólenip, úlgi bolyp júrsizder, Qazaqstandyqtar ardagerlerge qamqorlyq tanytyp, qurmet kórsetip, olardy árdaıym esterinde saqtaıdy. Sizderge, otbasylaryńyzǵa zor densaýlyq, taýsylmas jiger, uzaq ta baqytty ǵumyr tileımin! - de sózin jetkizdi Mańǵystaý oblysynyń ákimi. «Prezıdentimizge de uzaq ǵumyr bersin! Bizdiń de elbasyǵa degen alǵysymyz sheksiz», - dep oıyn bildirdi ardager. Ákim sodan keıin 91 jastaǵy Qamqa Úmbetáliqyzyna bardy. 1942 jyly 19 jasynda soǵysqa shaqyrylǵan ol soǵys aıaqtalǵansha qıyr shyǵysta maıdanda 9-shy áýe áskerinde qyzmet etken.   «Otan úshin», «UOS fashısik Germanıany jeńgeni úshin» orden, medaldarymen qosa,  ol Iosıf Stalınniń qolynan alǵys hat alǵan. Qamqa Úmbetáliqyzy 1945 jyly Japonıa áskerine qarsy jaýyngerlik áýe ushyrylymyna qatysqan. Onda «Japonıadaǵy jeńisi úshin» ordenimen marapattalǵan. Barlyǵy qorjynynda 16 orden, medal bar. Soǵystan keıin munaı salasynda qyzmet etken. Úshinshi ardager Bısen Boqaev. Qarıa 19 jeltoqsanda 91 jasqa tolypty. 1942 jyly áskerge shaqyrylyp, jeńisti keńestik-rýmyndyq shekarada qarsy alǵan. Ol Moldavıa, Rýmynıa, Vengrıany azat etýge qatysqan. Tórtinshi bolyp oblys ákimi tórt jyl boıy soǵysta aıqasqan 92 jastaǵy Balabaı Azanovty quttyqtady. Soǵysqa deıin ardager Ýkraınada turǵan, Túrkimenstan týmasy. Sol jerden 1941 jyly áskerge shaqyrylady.  Stalıngradty azat etýge qatysqan. «Soǵys jyldary 2 ret jaralanǵam. Qazir 2 top múgedegimin, qulaǵym nashar estıdi. Sonda da oqyǵandy jaqsy kóremin», - dedi ol qonaqtarǵa býma-býma gazetterin kórsetip. 30 jeltoqsanǵa deıin Prezıdenttiń tapsyrmasy boıynsha oblys, qala, aýdan ákimderi barlyq soǵys ardagerlerin aralap shyǵady. Búginde olardyń sany - 66. Olarǵa Prezıdent atynan syılyqtar tabystalyp, Elbasynyń arnaıy quttyqtaýy jetkiziledi.