Aqtóbelik soǵys ardagerlerine Jeńistiń 70 jyldyǵyna oraı Elbasy Nursultan Nazarbaevtyń atynan syılyqtar tabystaldy, dep habarlaıdy Vnews.kz tilshisi.
Jańa jyl qarsańynda osyndaı marapatqa Aqtóbe oblysynda turatyn 180 Uly Otan soǵysynyń ardageri ıe boldy. Prezıdenttiń atynan joldanǵan syı-sıapattardy aımaq basshysy men 12 aýdannyń ákimi úıdi-úıdi aralap ózderi tabystap júr. Mundaı qurmetke ıe bolǵanyna 87 jastaǵy aqsaqal Fedor Chemodanov qýanyshty.
«Elbasymyzdyń Uly Otan soǵysy ardagerlerin árdaıym nazardan tys qaldyrmaı, qurmettep júretinine dán rızamyn. Nursultan Ábishulyna alǵysym zor. Jańa jyl qarsańynda elimiz tynysh bolsyn, Qazaqstanymyz qaryshtap damı bersin dep tileımin»,-deıdi UOS ardageri Fedor Chemodanov. Aqtóbe oblysynyń ákimi Arhımed Muhambetov Prezıdent atynan joldanǵan syıdy sondaı-aq Jalǵasbaı Qýatov, Vladımır Fınútın jáne Almat Ermaǵambet aqsaqaldarǵa ózi tabystady. Qarıalar ótken kúnderin eske alyp, qazirgi ǵumyrlaryna shúkirshilik aıtyp otyrǵandaryn jetkizdi. UOS ardageriniń jesiri Evdokıa Sanjarova bolsa 2014 jylǵa esh ókpesi joǵyn aıtady. Sebebi, Elbasynyń balalyq shaǵynyń kýási bolǵan keıýana bıyl Nursultan Nazarbaevpen jergilikti emhanada tekseristen ótip júrgende júzdesip qalǵan edi. «Prezıdenttiń úıimen Shamalǵanda kórshi turdyq. Ata-anasymen jaqsy aralastym. Nursultannyń azamat bolǵany kóz aldymda. Onymen júzbe-júz kezdessem dep armandap júr edim. Bıyl ol armanym oryndaldy. Ótkendi eske aldyq. Endi, mine taǵy da onyń atynan syılyq tartý etip jatyr. Úlkenderge izet kórsete biletin azamattar kóp bolsyn!»,-dep aq tilegin Evdokıa ájeı jaýdyrdy.
