«The Efır» jobasynda Olımpıada chempıony, belgili boksshy Danıar Eleýsinov Láılá Sultanqyzyna óziniń tabysy jaıly jáne kásipqoı boksqa ne sebepti aýyspaı qalǵanyna qatysty, sonymen qatar, áıelimen ajyrasqany týraly jańa mán-jaıdy baıandady,  — dep habarlaıdy Qamshy.kz aqparat agenttigi Tengrinews.kz saıtyna silteme jasaı otyryp.

Suhbat barysynda Eleýsinov jeke ómiri jaıly derekterdi ashyq aıtty.  «Negizinde qupıa saqtaǵym kelgen. Shynymdy aıtsam, qazir januıam qasymda emes. Balammen aralasamyn. Jaqyn arada ǵana sondaı sheshimge keldik. Alda ýaqyt kórsetedi. Bólek turyp kóreıik, eń bastysy bul jerde bizdi ustap turǵan bala bolatyn, bala qınalyp qalmasyn dedik. Ákesinen aıyrylmasyn degen oıymyz boldy. Erkek bolǵannan keıin balamnan eshqashan bas tartpaımyn. Balamdy qatty jaqsy kóremin, balajanmyn. Oǵan búkil jaǵdaıdy jasaýǵa tyrysamyn», — dedi Eleýsinov otbasy jaıly. 

Sonymen qatar, ol bala kezindegi armanynyń oryndalǵanyn baıandady.  «Bala kezimde Olımpıada chempıony bolý armanym edi. Armanyma jettim. Qazir sheshim qabyldadym, ázirshe áýesqoı boksta qaldym dep aıta alamyn. Sebebi maǵan kelip túsken usynystar kóńilimdi tolyqtaı toldyrǵan joq. Basynda kásipqoı boksqa aýysamyn dep oılaǵanmyn, biraq usynys túsirgender kelisimshart boıynsha óz mindetin oryndamady. Olar qazaq sportshysyna mundaı kóp aqsha tólegenshe, ózimizge aqsha quıaıyq degen sıaqty, sondaı bir sybystar boldy», — dedi boksshy kásipqoı rıngke ótý máselesi jaıly.

Osydan keıin júrgizýshi Láılá Sultanqyzy sportshyǵa Elbasymen kezdeskeni jaıly aıtyp berýin ótindi. «Óte qýanyshty sezimde boldym. Elbasy quttyqtap, januıam týraly surady, áıelimmen jáne balammen birge shyǵyp kele jatqan kezimde "otbasyń ba?" dep surady. Balandın sol jaǵynda, men oń jaǵynda otyrdym. Elbasyǵa sportshylarǵa degen kózqarasy úshin alǵys aıttym, sonda aıaǵymnan osylaı qaqqan bolatyn. Onyń ózi maǵan úlken mártebe, abyroı», — dep baıandaıdy suhbatta Eleýsinov.