Ál-Farabı atyndaǵy Qazaq ulttyq ýnıversıtetinde «Nazarbaev modeli» ǵylymı konferensıasy ótti. Konferensıa QR Tuńǵysh Prezıdenti - Elbasy kitaphanasynyń «N.Nazarbaev: dáýir, tulǵa, qoǵam» kóshpeli bilim berý jáne mádenı-aǵartýshylyq kórme jobasy aıasynda uıymdastyryldy.

Atalmysh koferensıa barysynda «Nazarbaev modeli» kitabynyń qazaq tilindegi nusqasynyń tusaýy kesildi. Avtorlardyń aıtýynsha, kitapta oqıǵalardy taldaý barysynda zamanaýı basqarý mektebinde kópshilikke tanymal «Keıs ádistemesi» birinshi ret keńinen qoldanylǵan. 1921 jyly garvard ýnıversıtetiniń bıznes-mektebinde ázirlengen keıs - saıası, ekonomıkalyq, áleýmettik ómirdegi naqty problemalardy taldaý jáne tájirıbelik basqarý sheshimderin daıyndaýǵa baǵyttalǵan ınteraktıvtik oqytý tehnıkasy. Iaǵnı, kitapta qazaqstandyq kúre joldyń negizin qalaǵan elimizdiń tuńǵysh prezıdentiniń basqarý sheshimderi ıakı algorıtmderi naqty oqıǵalarmen jáne mysaldarmen ashylady. Kitap ǵalymdar, saıasattanýshylardan bastap mektep oqýshysyna deıin túsinikti ári qyzyqty bolmaq deıdi mamandar.

Koferensıanyń ashylýynda sóz sóılegen Almaty ákiminiń orynbasary «Nazarbaev modeliniń» ereksheligine toqtaldy.

«Nazarbaev modeli» degende eń aldymen, konfesıaaralyq, ishki saıasaty, turaqtylyqty aıtamyz. Ekinshiden, osy ishki saıası turaqtylyq elimizge, Elbasyna óte qarqyndy túrde saıası, ekonomıkalyq reformalar júrgizýge múmkindik berdi. Úshinshiden, meniń oıymsha «Nazarbaev modeliniń» ereksheligi óte jaýapty syrtqy saıasatty júrgizýinde. 25 jyl ishinde birde bir memleketpen kıkiljińge kelgen emespiz. Astana Elbasynyń basty megajobasy», - dep atap ótti Qyryqbaev.

Onyń aıtýynsha, biz astanamyzdy aýystyrǵan jer betindegi saýsaqpen sanarlyq memleketterdiń qataryndamyz. Ol, Astana – Elbasynyń basty jáne biregeı jobasy ekendigin atap ótti.

«Meniń oıymsha, 25 jylda Qazaqstannyń damýyn aıqyndaǵan mega joba osy - Astana qalasynyń salynýy. Sonymen qatar, biz mádenıetimizdi de túgendedik. «Mádenı mura» syndy úlken jobalar júzege asty. «Rýhanı jańǵyrý» baǵdarlamasyna bárimiz at salysyp jatyrmyz», - dedi Almaty qalasy ákiminiń orynbasary Arman Qyryqbaev.

Atalmysh shara barysynda Ál-Farabı atyndaǵy Qazaq Ulttyq ýnıversıtetiniń rektory Ǵalymqaıyr Mutanov atalmysh kitappen árbir stýdenttiń tanysýy mańyzdy ekendigin atap ótti.

«Kitapty ár qazaqstandyq ásirese bizdiń stýdentter jete tanyssa degen oıymyz bar. Óziniń tarıhyńdy bil, óziniń memlekettik qurylysyn bile otyryp, tek jastar emes ár qazaqstandyq ári qaraı da óziniń myna sanasynda memleketimiz qandaı, memeleketimizdiń bolashaǵy qandaı, memleketimiz qandaı qurylymdardan turady, memleketimizdiń damý prınsıpteri qandaı degen suraqtarǵa jaýap ala alady»,-dedi ál-Farabı atyndaǵy Qazaq Ulttyq ýnıversıtetiniń rektory, Ǵalymqaıyr Mutanov.

Aıta keter bolsaq, kitap avtorlary Mahmut Qasymbekov, Baqytjan Temirbolat, Tımýr Shaımergenov bolyp tabylady.

 Eske sala keteıik, elbasy kitaphanasynyń «Nursultan Nazarbaev: dáýir, tulǵa, qoǵam» kóshpeli jobasy QR tuńǵysh prezıdenti kúni jáne táýelsizdik kúni merekesi qarsańynda Almatyda kóshpeli qor kórmesimen ashylǵan bolatyn. Onda el prezıdentiniń jeke arhıvi, jeke kitaphanasy jáne mýzeı qorynyń jádigerleri qoıylǵan. Kórme QR Ortalyq memlekettik murajaıynda 2018 jyldyń 14 qańtaryna deıin ashyq bolady.