Qazaqstan Respýblıkasy Mádenıet jáne sport mınıstrligi Tilderdi damytý jáne qoǵamdyq-saıası jumys komıteti 2017 jyldyń 9 maýsymynda «Memlekettik tildi oqytý ádisnamasyn jetildirý men standarttaýdy iske asyrý joldary» taqyrybynda respýblıkalyq onlaın semınar ótkizedi.

Jambyl oblysy Tilderdi damytý basqarmasynyń Memlekettik tildi oqytý ortalyǵynda ótetin semınar barysynda onlaın rejımi arqyly memlekettik tildi oqytý ádisnamasyn jetildirý men standarttaý joldaryn júzege asyrý qarastyrylady. Sondaı-aq ozyq tájirıbeni zerdeleý jáne qorytý, oqytýdyń qazirgi zamanǵy ádisteri men tehnologıalaryn tájirıbege engizý máseleleri sóz bolady.

Semınarǵa QR Mádenıet jáne sport mınıstrligi Tilderdi damytý jáne qoǵamdyq-saıası jumys komıtetiniń qyzmetkerleri, Memlekettik tildi oqytýdyń óńirlik ortalyqtarynyń mamandary, ǵylymı-ádistemelik keńes músheleri, aımaq ǵalymdary men til mamandary, Ulttyq testileý ortalyǵy QAZTEST júıesin damytý basqarmasynyń mamandary qatysady.

Semınar barysynda ádisker-ǵalymdar onlaın rejımi arqyly memlekettik tildi oqytýdyń tıimdi tehnologıalary men ádis-tásilderimen bólisedi. Tilderdi oqytý ortalyqtary men respýblıkaǵa belgili úzdik ádiskerler sheberlik sabaqtaryn kórsetedi.

tilortalyq.kz