Juma kúni Aqtóbe qalasynyń qylmystyq ister jónindegi sotynda bıylǵy 27 mamyrda Aqtóbe túrmesinde (KA-168/1 mekemesi) qamaýda otyrǵan 39 jastaǵy Berik Ábdirahmanovtyń ústinen qylmystyq-atqarý mekemesi ákimshiligine baǵynbaǵan degen aıyppen qozǵalǵan is boıynsha sot prosesi bastaldy. Bul týraly Azattyqqa tutqynnyń áıeli ári qoǵamdyq qorǵaýshysy Gúlim Ábdirahmanova habarlady,- dep jazady Qamshy.kz aqparat agenttigi. Búgingi sot otyrysynda birneshe kýáger – túrme ákimshiliginiń qyzmetkerlerinen jaýap alynǵan. Sottyń kelesi otyrysy 24 qarashada ótpek.

Gúlim Ábdirahmanovanyń aıtýynsha, oǵan qamaýdaǵy kúıeýi Berik Ábdirahmanov, arasynda osy sotta qorǵaýshy taraptyń kýágeri retinde kórsetilgen adamdar da bar, birneshe tutqynnyń jazǵan "aqtyq hatyn" tabys etken. Búgingi sot otyrysynda Berik Ábdirahmanov ol adamdarǵa túrme ákimshiligi qysym kórsetýi múmkin ekenin aıtyp, sottan olardyń qaýipsizdigin qamtamasyz etýdi surady deıdi Gúlim Ábdirahmanova.

Tutqyn Berik Ábdirahmanovty sotta qorǵaý úshin osynyń qarsańynda Gúlim Ábdirahmanova jaldaǵan advokat Aıbek Qoıanovtyń aıtýynsha, Ábdirahmanovqa qylmystyq kodekstiń "Qylmystyq-atqarý mekemesi ákimshiliginiń zańdy talaptaryna baǵynbaý" baby boıynsha aıyp taǵylǵan. Buǵan deıin memleket taǵaıyndaǵan advokat syrqattanyp qalǵandyqtan bul proseske qatyspaǵan.

Tutqyn Berik Ábdirahmanovtyń isi boıynsha sot proesine Qazaqstannyń adam quqyqtary jónindegi búrosynyń Aqtóbe oblystyq fılıalynyń jetekshisi mindetin atqarýshy Irına Golsvart baqylap otyr.

Berik Ábdirahmanovty 2010 jyly tamyzdyń 3-i kúni Astananyń Saryarqa aýdandyq soty dinı arazdyqty qozdyrdy, zańmen tyıym salynǵan dinı uıymǵa múshe boldy jáne terorızmdi nasıhattady degen aıyptarmen alty jylǵa sottaǵan. Jaza merzimin óteý 2009 jylǵy qazannyń 3-inen bastap eseptelgen.

Ábdirahmanov túrmede otyrǵan kezde, 2013 jylǵy aqpannyń 13-i kúni Pavlodar qalalyq soty dinı arazdyqty qozdyrdy degen aıyppen ony tórt jylǵa sottaǵan. Ótelgen jáne ótelmegen merzimderin alyp-qosqanda, ekinshi is boıynsha úkim kesilgen kúnnen bastap ol túrmede bes jyl alty aı otyrýy tıis bolǵan.

Taraz qalasy sotynyń 2015 jyly aqpannyń 3-i shyqqan qaýlysyna sáıkes, Berik Ábdirahmanovtyń birinshi isi boıynsha 2010 jylǵy tamyzdyń 3-i kesilgen úkim ózgertilgen, ıaǵnı terorızmdi nasıhattaý aıyby sotpen tyıym salynǵan dinı uıymǵa múshe boldy degen bapqa aýystyrylǵan, buǵan qosa, jańa jaza merzimi – 2012 jylǵy qarashanyń 28-inen bastap 2018 jylǵy mamyrdyń 27-sine deıin dep belgilengen.

Buǵan deıin týystary Berik Ábdirahmanovty "túrmede uryp-soǵyp, azapataǵany" týraly shaǵymdanǵan. Týystary tutqyn vıdeokamera aldynda dinı kózqarasynan bas tartýǵa kónbegeni úshin azap shegip jatyr dep sanaıdy. Úı-ishi eki márte týberkýlezge shaldyǵyp, aıaǵyndaǵy qan tamyrlarynda túıinder (varıkoz) paıda bolǵan tutqynǵa naýqasqa tıesili taǵam da jetkilikti berilmeı otyr dep shaǵymdanǵan.

Túrme ákimshiligi Berik Ábdirahmanovqa qysym jasalǵany týraly aıyptaýlardy joqqa shyǵarady jáne tutqyn naýqasqa tıesili dári-dármek pen tamaqtyń barlyǵyn alyp otyr dep málimdeıdi. Túrme ákimshiliginiń sózin joǵary turǵan mekemeler men baqylaýshy organdar da rastaıdy.

Quqyqqorǵaýshylar qazirgi túrmelerdegi tártip pen 2015 jylǵy qańtardyń 1-nen qoldanysqa engen jańa qylmystyq zańnama bılikke qyryna alǵan tutqyndarǵa "qıt etkeni" úshin jańadan is qozǵap, túrmede qansha ustaǵylary kelse, sonsha ýaqyt ustaýǵa múmkindik beredi dep málimdeıdi.

Eske salaıyq, 39 jastaǵy tutqyn Berik Ábdirahmanov «dinı-radıkaldyq» baptar boıynsha, onyń ishinde dinı arazdyqty qozdyrǵany úshin jáne Qazaqstanda tyıym salynǵan «Hızb ýt-Tahrır» dinı uıymyna múshe bolǵany úshin 2009 jyly tutqyndap, alty jylǵa sottaǵan. Ol kezde alty adam sottalǵan edi, olardy tórt jyldan jeti jylǵa deıin merzimge túrmege kesken. Bári jazasyn ótep, bostandyqqa shyqqan. Al Berik Ábdirahmanov túrmede otyrǵanyna úsh jyl bolǵanda, ıaǵnı 2012 jyly jańa merzim qosylǵan.